काठमाडौं । काठमाडौं प्रहरी परिसरले पूर्व डीआईजी तथा एमालेका नवनिर्वाचित सांसद नवराज सिलवाललाई कीर्ति काण्डमा बयानका लागि उपस्थित हुन निर्देशन दिँदै पत्र काटेको छ ।

काठमाडौं प्रहरीले महानगरीय प्रहरी परिसर ललितपुरलाई कीर्ति काण्डका अभियुक्त सिलवाललाई उपस्थित गराउन भन्दै पत्राचार गरेको हो । पूर्व डिआइजी सिलवाल भने बयान छल्न सोमबार बेलुका विदेश गएका छन् ।

मलेसियाको क्वालालम्पुरमा हुने एक कार्यक्रममा भाग लिने भन्दै पूर्व डिआईजी सिलवाल पत्र बुझ्नुभन्दा एक दिन अगाडि नै त्यसतर्फ प्रथान गरेको स्रोतले जनाएको छ । मलेसिया गएका सिलवाल कहिले फर्कने हुन् केही बताइएको छैन ।

काठमाडौं प्रहरी प्रमुख एसएसपी रविन्द्र धानुकले सूचना चुहाएका कारण सिलवाल सोमबार साँझ मलेसिया प्रस्थान गरेको उच्च स्रोतले जनाएको छ ।

सिलवाललाई कारबाही गर्न एसएसपी धानुकले अटेर गरेपछि उनलाई हटाएर काठमाडौं प्रहरीमा नयाँ एसएसपीलाई पठाउने तयारी गरेपछि बाध्य भएर धानुकले पत्र काटेका हुन् ।

काठमाडौं प्रहरी प्रमुख एसएसपी रविन्द्र धानुकका अनुसार कार्य सम्पादन मूल्यांकन कीर्तेकाण्डसम्बन्धमा थप अनुसन्धान गर्नुपर्ने भएकाले सिलवाललाई उपस्थित गराउन ललितपुर प्रहरीलाई पत्राचार गरिएको हो ।

सर्वोच्च अदालतले कार्य सम्पादन मूल्यांकन कीर्ते भएको ठहर गर्दै अनुसन्धान प्रक्रिया अघि बढाउन सरकारलाई भनेको थियो । सोही अनुसार प्रहरीले यस सम्बन्धमा छानविन अघि बढाएको छ ।

सिलवाल पनि मुछिएकाले उनलाई बयानका लागि बोलाइएको प्रहरीले जानकारी दिएको छ । ललितपुरमा रहने भएकाले सिलवाललाई काठमाडौं प्रहरी परिसरमा उपस्थित गराउन पत्राचार गरिएको हो ।