काठमाडौं । नेपाली कांग्रेसका युवा नेता तथा केन्द्रीय सदस्य गगन थापाले भारतीय प्रधानमन्त्री नरेन्द्र मोदीको विरोध गर्ने समूह र राजनीतिक दलको समर्थनमा कडा प्रक्रिया दिएका छन् ।

सांसद रहेको कांग्रेस नेता थापाले मोदीको विरोधमा कार्यक्रम गर्ने विवेकशील साझा पार्टीको केन्द्रीय कार्यालयमा प्रहरीले हस्तक्षेप गरेको भन्दै आपत्ति जनाएका हुन् । उनले नाकाबन्दीको विरोधी ब्यानर च्यातेकोमा आपत्ति जनाएका छन् ।

संविधानले दिएको फरक मत राख्न पाउने र अहिंसात्मक विरोध गर्न पाउने अधिकारविरुद्धको सो कार्य निन्दनीय भएको थापाले जनाएका छन् ।

‘हाम्रो संविधानले फरक मत राख्न र अहिंसात्मक विरोध गर्न पाउने अधिकार सुनिश्चत गरेको छ । त्यही संवैधानिक अधिकारको प्रयोग गर्दै गरिएको यस्तो सिर्जनात्मक विरोध पनि सहन नसक्ने ?’, थापाले सामाजिक सञ्जालमार्फत कडा प्रक्रिया दिँदै भनेका छन्, ‘विवेकशील साझाको ब्यानर च्यात्नु असंवैधानिक र निन्दनीय कृत्य हो ।’

प्रहरीले शुक्रबार दिउँसो ललितपुर बखुन्डोलस्थित सो विवेकशील साझाको केन्द्रीय कार्यालयबाट नाकाबन्दीको विरोध गरिएको तुल झिकेको थियो ।

ललितपुरका प्रमुख जिल्ला अधिकारी माधव पन्थले सरकारको नीतिअनुसार तुल झिकिएको बताएका छन् ।

विवेकशील साझा पार्टीलाई पश्चिमा राष्ट्रहरूको आर्थिक सहयोगमा चलेको आरोप लाग्दै आएको छ ।