बारा । कर्मचारी मिलन केन्द्रको पिकनिकमा गएर फर्किर्दै गर्दा बाराका प्रमुख जिल्ला अधिकारी (सिडिओ) गणेश भट्टराई चढेको गाडी दुर्घटना हुँदा सशस्त्र प्रहरीका एसपी बलराम पोखरेलको मृत्यु भएको छ ।

शहीद हीरालाल गौतमको स्मृति पार्कमा शनिबार आयोजित पिकनिक सकेर फर्किदै गर्दा सिडिओ सवार गाडी दुर्घटनामा परेको थियो । दुर्घटनामा सशस्त्र प्रहरी उपरीक्षक (एसपी) पोखरेलको मृत्यु भएको प्रहरीले जनाएको छ ।

गाडीमा सवार सिडिओ गम्भीर घाइते छन् । चालकसहित अन्य तीनजना घाइते छन् ।

सिडिओ सवार गाडी पथलैया निजगढ सडकखण्डको पसाहा पुलनजिक दुर्घटना भएको थियो ।

सिडिओ सवार गाडी रोकिराखेको ट्याक्टरको ट्रेलरमा ठोक्किएर दुर्घटना भएको हो ।

गाडी सडकबाट १० मिटर तल खसेको छ । गाडीमा सवार एसपी पोखरेललाई दुर्घटना लगत्तै सिमरास्थित अल्पाइन अस्पतालमा लगिएको थियो ।

अस्पताल पुर्याएपछि चिकित्सकले उनलाई मृत घोषणा गरेका हुन् ।

गम्भीर घाइते सिडिओ भट्टराईलाई थप उपचारका लागि वीरगन्ज पठाइएको छ । गाडी चालक जगत पट्टेल, सशस्त्र प्रहरी हवल्दार सञ्जयकुमार यादव, नेपाल प्रहरीका हवल्दार शम्भु गुरुङको स्थानीय अस्पतालमा उपचार भइरहेको छ ।