काठमाडौं । सत्तारुढ दल नेपाल कम्युनिस्ट पार्टी (नेकपा)की राष्ट्रिय सभामा सांसद कोमल ओलीले कथित लिटिल बुद्धका नामले परिचित रामबहादुर बमजनका काण्डहरूका विषयमा के कारबाही भएको छ भनेर गृहमन्त्री रामबहादुर थापासँग जवाफ मागेकी छिन् ।

राष्ट्रिय सभाको बुधबारको बैठकमा गृहमन्त्री थापासँगको प्रश्नोत्तर कार्यक्रममा प्रश्न गर्दै सांसद ओलीले प्रश्न गर्दै भनिन्, ‘लिटिल बुद्ध रामबहादुर बमजनको अपराध र क्रियाकलाप बाहिर आफैं आएर पीडित युवतीहरूले भन्दा पनि अहिलेसम्म किन कारबाही हुन सकेको छैन ?’

बमजनलाई पक्राउ गर्न किन नसकेको भन्दै सांसद ओलीले यस विषयमा प्रहरीको कारबाही कहाँ पुग्यो भनि प्रश्न गरेकी हुन् ।

‘सुन्नमा आएको छ । प्रहरीले दिएको प्रतिक्रियामा हामीले पक्राउ गर्न सक्ने अवस्थामा छैनौं भनेको छ’, उनले भनिन्, ‘के कति कारणले उनीमाथिको कारबाही अगाडि बढेको छैन । यस सम्बन्धी म जानकारी चाहन्छु ।’

सांसद ओलीको प्रश्नपछि गृहमन्त्री थापाले भने, ‘राज्यले यसलाई गम्भीरताका साथ लिएको छ । यसको बारेमा सरकारले छानबिन गरिरहेको छ ।’

गृहमन्त्री थापाले भने, ‘मिडियामा पनि आइरहेको छ । सबैलाई थाहा छ । यसलाई सरकारले हल्का रूपमा लिएको छैन । गम्भीर रूपमै लिएको छ ।’