काठमाडौं । नेपाली कांग्रेसका केन्द्रीय सदस्य गणेश लामाले गैरआवासीय नेपाली हब खड्का भनेर चिनिने ज्ञानेन्द्र खड्काले आफूमाथि लगाएको आरोपमा कुनै सत्यता नरहेको बताएका छन् ।

बुधबार काठमाडौंमा पत्रकार सम्मेलन गरेर लामाले आफूमाथिको आरोप राजनीतिक चरित्र हत्या गर्नका लागि कसैको उक्साहटमा परेर लगाइएको हुनसक्ने बताए । ज्ञानेन्द्र निकै विवादित व्यक्ति हुन् । उनको नाम विभिन्न अपराधका घटनाहरूमा जोडिएका छन् । आफै शंकास्पद गतिविधि गर्दै आएका ज्ञानेन्द्रले लामालाई अपहरणको आरोप लगाएका छन् ।

ज्ञानेन्द्रले आफूलाई लामा र सहदेव कक्षपतिलगायतले अपहरण गरेर फिरौतीवापत करोडौंको कागज गराएको आरोप लगाएका छन् । ज्ञानेन्द्रको आरोपको खण्डण गर्दै लामाले कागज जग्गा कारोबारसँग सम्बन्धित रहेको बताएका छन् ।

ज्ञानेन्द्रले ‘यो जग्गा मलाई पास गरिदिनुुस्, ३ महिनापछि पैसा दिन्छु’ भनेपछि आफूले २०७१ असोज ३० गते ज्ञानेन्द्रकी श्रीमती नानीमैयाँ कार्कीको नाममा जग्गा पास गरिदिएको लामाले बताएका छन् ।

जग्गा पास गरेको ९/१० वर्षसम्म पनि ज्ञानेन्द्र सम्पर्कविहीन बनेर बसेको उनले बताए । डेढ/दुई महिना अगाडि ज्ञानेन्द्रसँग जम्काभेट हुँदा उनैले जग्गाको पैसा दिन्छु भनेर छिनोफानो गरी कागज गरिएको नेता लामा बताएका छन् । जग्गा अहिले पनि ज्ञानेन्द्रकी श्रीमतीको नाममा रहेको लामाले बताए ।

‘उहाँ मसँग झण्डै ९/१० वर्षदेखि सम्पर्कविहीन भएर बस्नुभयो । कहिले विदेश छु, कहिले कहाँ छु भनेर प्रतिक्रिया दिइराख्ने र उहाँ कहिले पनि सम्पर्कमा आउनुभएन’, लामाले भने ।

‘आजभन्दा डेढ दुई महिना अगाडि उहाँको र मेरो एक ठाउँमा जम्काभेट भयो’, उनले भने, ‘उहाँलाई त्यहाँ भेट्दाखेरी उहाँ आफैंले दाई तपाईँको पैसा दिन्छु भनेर छिनोफानो गर्नुभएको हो ।’

उनले भने, ‘अहिले पनि आनाको ५० लाख जाने ४० आना जग्गा उहाँको श्रीमतीको नाममा पास छ । त्यही जग्गाको बारेमा उहाँसँग कागज गरिएको हो । कानूनबमोजिम वडामा उहाँ आफैं गएर कागज गर्नुभएको छ ।’

उक्त विषयमा अहिले छानविन भइरहेको बताउँदै नेता लामाले दोषी ठहरिए आफू कानूनबमोजिमको सजाय भोग्न तयार रहेको बताएका छन् ।

ज्ञानेन्द्र खड्का र आफूले विगतमा साझेदारी व्यवसायसमेत गरेको उनले बताएका छन् । आफ्नी श्रीमती र ज्ञानेन्द्रकी श्रीमतीको नाममा दर्ता कायम रहेको ट्राभल कम्पनी अहिले पनि रहेको लामाले बताए ।

ज्ञानेन्द्रले प्रहरीमा गएर उजुरी दिएको अवस्थामा मिडियामा आएर प्रचारबाजी गरेको भन्दै उनले आपत्ति जनाएका छन् ।

कारोबारको कुरालाई लिएर आफ्नो चरित्रहत्या गरिएको उनको भनाइ छ । ०७१ सालमा आनाका २५ लाखका दरले धुलिखेल चोकको जग्गा आफूले पास गरिदिएको लामाले बताएका छन् ।

पैसा नतिर्ने नियतले आफूमाथि अपहरणको आरोप लगाइएको हुनसक्ने लामाले बताएका छन् । ज्ञानेन्द्रले पाट्नरसिपमा काम गरिरहेको अवस्थामा ‘बैंकको कारोबार मिलाएर लोन लिन्छु र तपाईँलाई पैसा दिन्छु’ भनेपछि तत्कालीन समयमा जग्गा पास गरिएको नेता लामाले बताएकाछन् ।

जग्गा पास गरेको केही समयबाट ज्ञानेन्द्र खड्का सम्पर्कविहीन भएपछि अपराध अनुसन्धान महाशाखामा आफूले निवेदनसमेत दिएको लामाले बताएका छन् ।

नेता लामाले ज्ञानेन्द्र आफैंले क्रिप्टो र विट्क्वाईन कारोबार गर्छु भनेर स्वीकार गरेको बताएका छन् । आफू उनीसँग त्यस प्रकारको कुनै कारोबारमा संलग्न नरहेको बताए ।