काठमाडौं । राष्ट्रिय स्वतन्त्र पार्टी (रास्वपा) की सांसद विनिता कठायतले बबाल गरेपछि श्री एयरलाइन्सको जहाज रनवेबाट पार्किङमा फर्किएको छ ।

शुक्रबार त्रिभुवन अन्तर्राष्ट्रिय विमानस्थलको रनवेमा उड्ने तयारीमा रहेको जहाजभित्र रास्वपाकी सांसद कठायतले बबाल गरेकी थिइन् । उनले जहाजभित्र बबाल गर्दै संसदमा कुरा उठाउने चेतावनी दिएपछि जहाजलाई पार्किङमा ल्याइएको स्रोतले जनाएको छ ।

सांसद कठायतले गर्दा श्री एयरलाईन्सको जहाज ३ घण्टा ढिलो उडेको छ । काठमाडौंबाट सुर्खेत उड्न लागेको जहाजभित्र कठायतले धम्की दिएपछि जहाजलाई पार्किङमा ल्याइएको हो ।

जहाजमा सांसद कठायत र यात्रुबीच झगडा परेको प्रत्यक्षदर्शीको भनाइ छ । उडान नम्बर एसएचए १२१ जहाज बिहान ७ बजे उड्ने नियमित तालिका थियो । सुर्खेतको मौसम खराब भएपछि साढे ८ बजे बोर्डिङ भएको थियो ।

रास्वपाकी सांसद कठायत र अन्य यात्रुबीच केही विषयमा भनाभन भएको प्रत्यक्षदर्शीले बताएका छन् ।

यात्रुहरू लफडामा उत्रिएपछि चालक दलका सदस्य र एयरलाइन्सका कर्मचारीले एयरपोर्टमा खटिएका प्रहरी अधिकृतलाई फोन गरेर बोलाएका थिए ।

सामान्य विषयलाई सांसद कठायतले संसदमा उठाउने धम्की दिएर बबाल खडा गरेकी थिइन् । रास्वपाकी नेतृ कठायत समानुपातिक सांसद हुन् । उनी जुम्लाको चन्दननाथ नगरपालिका निवासी हुन् ।

सहकारीको करोडौं रकम हिनामिना र अपचलन काण्डमा मुछिएका तथा विभिन्न काण्डैकाण्डमा परेका रास्वपाका सभापति रवि लामिछानेले हालै सार्वजनिक बसमा चढेर नौटंकी गरेका बेला उनै दलकी सांसद विनिता कठायतले जहाजभित्र बबाल गरेर चर्तिकला देखाएकी छिन् ।