लमही । दाङमा मोटरसाईकल दुर्घटना हुँदा दुई जनाको मृत्यु भएको छ ।

बिहीबार बिहान लमही नगरपालिका वडा नं. ६ वेलदमारमा भएको सडक दुर्घटनामा दुई जनाको मृत्यु भएको जिल्ला प्रहरी कार्यालय दाङद्वारा जारी विज्ञप्तिमा उल्लेख छ ।

लमहीबाट घोराहीतर्फ आउँदै गरेको रा. ८ प २९४० नम्बरको मोटरसाईकल दुर्घटना हुँदा मोटरसाईकलमा सवार दुई जनाको मृत्यु भएको प्रहरीले जनाएको छ ।

मृत्यु हुनेमा मोटरसाईकल चालक घोराही उपमहानगरपालिका वडा नं. १८ नवलपुर बस्ने वर्ष २२ को श्रवणकुमार पुन र मोटरसाईकलको पछाडि सवार घोराही उपमहानगरपालिका वडा नम्बर ४ बस्ने वर्ष २१ को विनोद केसीको मृत्यु भएको प्रहरीले जनाएको छ ।

दुर्घटनामा घाइते भएका व्यक्तिहरुलाई लमही अस्पतालतर्फ पठाइएको थियो । घाइते दुबैलाई चिकित्सकहरुले ८ बजेर ५५ मिनटमा मृत घोषणा गरेको थियो ।

मृतकहरुको साथमा भेटिएको परिचय खुल्ने कागजातका आधारमा सनाखत भएको प्रहरीले जनाएको छ ।