कृष्णनगरमा २० लाख भारतीय रुपियाँसहित दुईजना पक्राउ

तौलिहवा । कपिलवस्तुको कृष्णनगर नगरपालिकाको लिन्क गेटबाट स्रोत नखुलेको साढे २० लाख भारतीय रुपियाँसहित २ जना भारतीय नागरिक पक्राउ परेका छन् ।

सोमबार साँझ २ वटा भारतीय नम्बर प्लेटको गाडी नेपाल भित्रिएको भारतीय रुपियाँ बरामद भएको प्रहरीले जनाएको छ । बरामद भएको भारतीय रुपियाँको स्रोत खुलेको छैन ।

पक्राउ पर्नेमा भारतको महाराष्ट्रस्थित राईगट जिल्लाका ३३ वर्षीय सलमान कुरैशी र ३९ वर्षीय उमेश सखराम रहेका प्रहरी नायब उपरीक्षक माहनमणि अधिकारीले बताएका छन् ।

युपी ४५ एएस ६६६३ र युपी ४२ डीटी ५७२१ नम्बरको भाडाका गाडीमा दुईजनासहित ६ जना सवार थिए ।

सलमानको झोलाबाट ८ लाख र सखरामको झोलाबाट साढे १२ लाख भारतीय रुपियाँ बरामद भएको छ ।

पक्राउ परेका दुबैजनालाई आवश्यक अनुसन्धान र कारबाहीका लागि राजस्व अनुसन्धान कार्यालय बुटवल पठाइएको छ ।

Published : Tuesday, 2024 October 22, 11:11 am