पञ्जाबबाट तिहार मनाउन नेपाल आउँदै गरेका २ नेपालीको दुर्घटनामा मृत्यु

तौलिहवा । भारतबाट नेपाल आउँदै गरेको कार दुर्घटना हुँदा २ जना नेपालीको मृत्यु भएको छ ।

भारतको पञ्जाबबाट बढ्नी नाका हुँदै घर फर्किरहेको पी.बी. १० जेएन ६१९९ हुण्डाई कार र युपी ४७ टी. २७०३ नम्बरको रोडवेज बस शनिबार बिहान एकआपसमा ठक्कर खाएर दुर्घटना भएको स्थानीय भारतीय प्रहरीले जनाएको छ ।

दुर्घटनामा कपिलवस्तु बाणगङ्गा नगरपालिका वडा नं. ९ बर्दहवाका दिनेश बेल्बासे र नवलपुरको गैँडाकोट नगरपालिका वडा नं. ६ का अनिल सापकोटाको मृत्यु भएको थाना पचपेडवा बलरामपुरले प्रेस विज्ञप्तिमार्फत जनाएको छ ।

कारमा सवार मृतक बेल्बासेका पत्नी शारदा बेल्बासे, बाणगङ्गा नगरपालिका जितपुर नम्बर ४ निवासी टेकबहादुर र उनकी पत्नी धनकला घाइते भएका छन् ।

उनीहरू पञ्जाबाट तिहार मनाउन नेपाल आउँदै थिए । सडकमा दुर्घटनामा परेपछि परिवार शोकमा परेको छ ।

Published : Saturday, 2024 November 2, 4:19 pm