काठमाडौं । नेपाल प्रहरी प्रधान कार्यालय नक्सालले तीन जना प्रहरी नायब उपरीक्षक (डीएसपी)हरूलाई हेडक्वाटर तानेको छ ।

बुधबार जारी सूचना अनुसार जिल्ला प्रहरी कार्यालय पर्साका डीएसपी दीपक भारतीलाई तानेर डीएसपी किशोर लम्साललाई हेडक्वाटरले काजमा खटाएको छ ।

डीएसपी लम्साल यसअघि काठमाडौं उपत्यका प्रहरी कन्ट्रोल रुम समन्वय शाखा रानीपोखरीमा दरबन्दी भए पनि प्रहरी प्रधान कार्यालय सुपरीवेक्षण तथा अनुगमन महाशाखा नक्सालमा कार्यरत थिए ।

डीएसपी भारतीलाई प्रहरी प्रधान कार्यालय सुरक्षा सेवा व्यवस्थापन महाशाखा नक्सालमा तानिएको छ ।

प्रहरी प्रधान कार्यालय केन्द्रीय प्रहरी समाचार कक्ष नक्सालमा दरबन्दी भइ जिल्ला प्रहरी कार्यालय रुपन्देहीमा कार्यरत डीएसी लक्ष्मी खनाललाई पनि हेडक्वाटर तानिएको छ ।

डीएसपी खनाललाई प्रहरी प्रधान कार्यालय महिला बालबालिका तथा जेष्ठ नागरिक सेवा निर्देशनालय नक्सालमा तानिएको सूचनामा उल्लेख छ ।