काठमाडौं । कृषा चौलागाईंको निर्माण र निर्देशन रहेको चलचित्र ‘पिताम्बर’को पोस्टर सार्वजनिक भएको छ ।

पोस्टर सार्वजनिक गरेसँगै निर्देशक चौलागाईंले चलचित्र ‘पिताम्बर’लाई चैतको २९ गते रिलिज मिति तोकेकी छिन् । शुक्रबार चलचित्र ‘पिताम्बर’को पोस्टर सार्वजनिक गर्दै रिलिज मिति घोषणा गरेकी हुन् । उनले नयाँ वर्षको साइत पारेर चलचित्र रिलिज गर्न लागेकी छिन् ।

कृषाले भनेकी छिन्, ‘मैले निर्माण र निर्देशन गरेका मेरा आफ्नै पछिल्ला चलचित्रहरूमध्ये विशेष छ । हाम्रा प्यारा देश र विदेशमा रहेका दर्शकहरूलाई माया स्वरुप पोस्टर र चलचित्र प्रदर्शन मिति सार्वजनिक गरेका छौं ।’

‘चलचित्र पिताम्बर २०८१ चैत २९ (११ अप्रिल २०२५) गते नव वर्षको हर्ष उल्लाससँङ्गै नेपालभरि र अन्य मुलुकमा प्रदर्शन हुने छ’, निर्देशक कृषाले भनेकी छिन्, ‘प्रतिक्रियाको लागि आभारी हुनेछौँ ।’

‘पिताम्बर’मा दयाहाङ राई, सौगात मल्ल, अनुपविक्रम शाही लगायतको अभिनय रहेको छ । चलचित्रको प्रचार प्रसारमा कृषाले शुरु गरिसकेकी छिन् ।