काठमाडौं । नेपाल तरुण दलको पौष २२ र २३ गते ललितपुरमा गर्ने भनिएको तरुण भेला स्थगित भएको छ ।

तरुण दलको केन्द्रीय कार्यालयका मुख्य सचिव ठानप्रसाद पोखरेलले बुधबार सूचना प्रकाशित गरेर पौष २२ र २३ गते ललितपुरस्थित नेपाली कांग्रेसको केन्द्रीय कार्यालयमा हुने भनिएको तरुण भेला विशेष कारणले स्थगित भएको जनाएका छन् ।

तरुण दलका अध्यक्ष विद्वान गुरुङले आन्तरिक तयारीमा समय नपुगेका कारण तरुण भेला तत्कालका लागि स्थगित भएको बताए । उनले भने, ‘आन्तरिक तयारी गर्नुपर्ने र अन्य विविध कारणले तरुण भेला तत्कालका लागि स्थगित भएको छ । उपयुक्त समयमा तयारीका साथ हुनेछ ।’ उनले सबै तरुण साथीहरूसंगकाे परामर्शपछि तरुण भेलाबारे निर्णय लिइने बताए ।

तरुण भेलाका लागि केन्द्रीय कार्यालयले केन्द्रीय सदस्य र जिल्ला अध्यक्षहरूलाई अनिर्वाय उपस्थितिका लागि सूचना जारी भइसकेको थियो । तरुण भेलालाई नेपाली कांग्रेसका सभापति शेरबहादुर देउवाले सम्बोधन गर्ने कार्यक्रम थियो ।