डीएसपी थापाको टोलीद्वारा घोराहीमा ठूलो परिमाणमा लागुऔषध बरामद

घोराही । जिल्ला प्रहरी कार्यालय दाङले तीन जनालाई झण्डै २४ किलो लागुऔषध चरेशसहित पक्राउ गरेको छ ।

बुधबार साँझ प्रहरी नायव उपरीक्षक (डीएसपी) ईश्वर थापाको कमाण्डमा खटिएको टोलीले ३ जनालाई चरेशसहित पक्राउ गरेको विज्ञप्तिमा उल्लेख छ । भान्साकोठामा प्लाष्टिकको ड्रमभित्र प्लाष्टिकको बिभिन्न पोका बनाई राखेको अबस्थामा २४ किलो ७ सय १० ग्राम तौल भएको लागुऔषध चरेश बरामद भएको थियो ।

घोराही उप–महानगरपालिका वडा नं. १३ सिर्जनशील टोलमा रहेको कुलबहादुर बस्नेतको घरको तल्लो फल्याटमा कोठा भाँडा बस्दै आएका प्यूठानको स्वर्गद्वारी नगरपालिका वडा नं. २ बस्ने वर्ष ३९ को निमबहादुर आले र नौबहिनी गाउँपालिका वडा नं.२ बस्ने वर्ष २१ की देउकली बुढा मगर तथा रोल्पाको त्रिवेणी गाउँपालिका वडा नं.७ बस्ने वर्ष २९ का प्रकाश घर्ती मगरलाई चरेसहित पक्राउ गरिएको विज्ञप्तिमा उल्लेख छ ।