काठमाडौं । नेकपा (माओवादी केन्द्र)सहितका ६ राजनीतिक दलहरूले हिउँदे अधिवेशन आह्वान गर्नका लागि सरकारलाई दवाव सिर्जना गरेका छन् ।

बुधबार सिंहदरबारमा बसेको माओवादी अध्यक्ष पुष्पकमल दाहाल ‘प्रचण्ड’सहितका नेताहरूको बैठकले हिउँदे अधिवेशन आह्वान गर्न सरकारसँग आग्रह गरेको छ । सरकारले हिउँदे अधिवेशन नबोलाएमा विशेष अधिवेशनसम्म प्रतिपक्षमा रहेका दलहरू जान सक्ने माओवादीका नेता वर्षमान पुनले बताए ।

बैठकपछि पत्रकारहरूसँग कुरा गर्दै माओवादी नेता पुनले भने, ‘सरकारले नियमित संसद नबोलाएर अध्यादेशमार्फत स्वयच्छाचारी ढङ्गले सरकार सञ्चालन गर्ने प्रवृत्ति र रवैया देखाएको छ । त्यसमा हामी ६ दलहरू एकै ठाउँमा रहेका छौं । सबैको चासो र चिन्ता सरकार स्वयच्छाचारी बन्दै गएको छ ।’

‘सरकारले संसदलाई छल्न खोजेको छ । हिउँदे अधिवेशन बोलाउन छाडेर अध्यादेशबाट सरकार चलाउन खोजिएको छ’, पुनले भने, ‘कानून बनाउने जिम्मेवारी हिउँदे अधिवेशनलाई हुने गर्छ । भरखरै ४ वटा अध्यादेश जारी भएका छन् । अर्को अध्यादेश राष्ट्रपति कार्यालयमा पुगेको खबर छ । सरकारको यो रवैया बेठिक भयो भन्ने साझा निष्कर्ष रहेको छ ।’

‘सरकारले नियमित अधिवेशन बोलाओस् । हिउँदे अधिवेशन बोलाओस् । जनताका सरोकारका विषयहरू, कानून निर्माणका विषयहरू संसदमा ल्याइयोस्’, माओवादी नेता पुनले भने ।

‘सरकारले जनप्रतिनिधि संस्थालाई छलेर काम गर्छ भने प्रतिपक्ष दलहरूको तर्फबाट आवश्यक प¥यो भने विशेष अधिवेशन माग गर्ने, आह्वान गर्नेसम्मको तयारी गरिरहेका छौँ’, चेतावनी शैलीमा पुनले भने ।

‘६ दलबीच तयारी गर्ने समझदारी भएको छ । महँगी बढेको छ, भ्रष्टाचार अनियन्त्रित बनेको छ, स्वयच्छाचारी बढेको छ । दुई ठूला पार्टी मिल्यौँ भन्ने नाममा जनताका आवाज, भावनाहरू विपरितका कामहरू हुँदै गएका छन् । खबरदारी गर्न जरुरी छ’, उनले भने ।

६ दलहरूले साना दलहरूलाई सिध्याउन थ्रेस होल्ड बढाउन लागेको भन्दै आपत्ति जनाएका छन् । साना दलहरूका कारण राजनीतिक अस्थिरता भइरहेका बेला सरकारले थ्रेस होल्ड बढाएर साना दलहरूको खेतीपाती बन्द गर्न खोजेको छ ।

पुनले भने, ‘थ्रेस होल्डको नाममा राजनीतिक दलसम्बन्धी विधेयक तयारी गरिरहेको छ । त्यसमा साना दलहरूको आवाज कमजोर पार्ने, जनताको सहभागिता अझ कमजोर बनाउन दुई दलीय व्यवस्थातिर लैजाने कार्य भइरहेको छ । यो कुरा बेठिक छ । साझा धारणा बनेको छ ।’

साझा धारणाको मस्यौदा बनाउन ६ दलले माओवादीबाट वर्षमान पुन र नेकपा (एकीकृत समाजवादी)बाट बेदुराम भसाललाई जिम्मेवारी दिएको छ ।

उनले भने, ‘ड्राफ्ट कमिटी बनाएका छौँ । दुई दिनभित्र साझा धारणा बनाएर छिटै सार्वजनिक गर्छौं । अरु दलहरूलाई पनि सहभागी गराउने छौँ ।’

बैठकमा नेकपा (माओवादी केन्द्र)का अध्यक्ष पुष्पकमल दाहाल, नेताहरू नारायणकाजी श्रेष्ठ, वर्षमान पुन र शक्ति बस्नेत, राष्ट्रिय स्वतन्त्र पार्टी (रास्वपा)का कार्यबाहक सभापति डोलप्रसाद अर्याल, नेकपा (एकीकृत समाजवादी)का अध्यक्ष माधवकुमार नेपाल र बेदुराम भुसाल, राप्रपाका बुद्धिमान तामाङ, आम जनता पार्टीका अध्यक्ष प्रभु साह र नेपाल समाजवादी पार्टीका अध्यक्ष महिन्द्रराय यादव र गंगानारायण श्रेष्ठको सहभागिता रहेको थियो ।