काठमाडौं । राष्ट्रिय प्रजातन्त्र पार्टीका महामन्त्री धवलशम्शेर राणाले देशलाई सही मार्गमा ल्याउन राजसंस्थावादी, हिन्दूवादी र राष्ट्रवादीहरू एकठाउँ उभिनु पर्ने बताएका छन् ।

शनिबार काठमाडौंमा राप्रपाको कागेश्वरी मनहरा नगर समितिले गरेको कार्यक्रममा राणाले भने, ‘देशको समग्र अवस्था बाटो भुलेको यात्री जस्तो भएको छ । विद्यमान सम्पूर्ण कमी कमजोरी अन्त्य गरेर अघि बढ्न राजावादी, हिन्दूवादी र राष्ट्रवादीको एकता आवश्यक भएको छ ।’

‘देश र समाजलाई संकटमुक्त गर्न राप्रपा दत्तचित्त भएर अघि बढेको छ, हामी लक्ष्य प्राप्त नगरेसम्म विश्राम लिँदैनौं’, राप्रपाका महामन्त्री तथा संगठन विभाग प्रमुख समेत रहेका राणाले भने ।

उनले स्थानीय तहको बल र विगत आन्दोलनको अनुभवका आधारमा राप्रपा यस पटक पूर्ण तयारीका साथ सडकमा उत्रने बताएका छन् ।

आन्दोलनकै बाटोबाट भ्रष्ट नेताहरूलाई विदा दिने राप्रपाका महामन्त्री राणाले बताएका छन् ।

राप्रपाका प्रवक्ता तथा संगठन विभागका सदस्य सचिव सगुनसुन्दर लावतीले देशको यथार्थ अवस्था अनुसार शासन नचलेको हुनाले देश र समाज ओरालो लागेको बताएका छन् ।

लावतीले भने, ‘राजसंस्था र हिन्दुत्व नेपाली समाजको विकास र निरन्तरताका लागि अपरिहार्य छन्, अन्योन्याश्रित छन् ।’

‘हिन्दु, वौद्ध र किरात सभ्यतामा आधारित नेपाल समाजमा राजसंस्था र सनातनसापेक्ष हिन्दु अधिराज्यको उपादेयता नजरअन्दाज गर्न सकिन्न’, लावतीले भने, ‘यसै मान्यता केन्द्रमा राखेर संविधान संशोधन गर्नु पर्दछ ।’

कागेश्वरी मनहरा नगर समिति अध्यक्ष मनिराम सिंखडाको अध्यक्षतामा सम्पन्न कार्यक्रममा काठमाडौं जिल्ला अध्यक्ष नवराज सिंखडाले काठमाडौं उपत्यकाकेन्द्रीत संगठन विस्तार कार्ययोजना अनुसार आन्दोलनलाई सफल तुल्याउन प्रत्येक वडाबाट कम्तिमा दशजना जुझारु युवा तयार गर्न स्थानीय इकाईलाई आग्रह गरेका छन् ।