हेटौँडा । जिल्ला प्रहरी कार्यालय मकवानपुरले हेटौँडाबाट १०७ किलो लागुऔषध गाँजा र बोलेरो गाडीसहित २४ वर्षीय सुजन तामाङलाई नियन्त्रणमा लिएको छ ।

थाहा नगरपालिका– २ पालुङका तामाङलाई मनहरीबाट हेटौँडातर्फ आउँदै गरेको बा. १२च २८८५ नम्बरको बोलेरो गाडीसहित पक्राउ गरिएको मकवानपुर प्रहरीका प्रमुख (एसपी) विश्वराज खड्काले बताएका छन् ।

तामाङले चलाएको बा. १२ च २८८५ नम्बरको बोलेरो गाडीलाई हेटौँडा उपमहानगरपालिका– १९ नेवारपानीमा रहेको चेकपोस्टमा रोकी जाँच गर्दा बोलेरोमा लुकाई ल्याएको अवस्थामा १०७ किलो गाँजा फेला परेको एसपी खड्काले बताए ।

यसैबीच, मकवानपुर प्रहरीले हेटौँडाबाट लागुऔषध खैरो हिरोइनसहित प्रहरीले २७ वर्षीय किरण सुनारलाई पक्राउ गरेको छ ।

प्रहरीले हेटौँडा उपमहानगरपालिका– १४ घर भई हाल हेटौँडा– १० न्युरेनीमा डेरा गरेर बस्ने किरण सुनारलाई पक्राउ गरेको जनाएको छ ।

सुनारलाई इलाका प्रहरी कार्यालय पशुपतिनगरबाट खटिएको प्रहरी टोलीले विशेष सूचनाका आधारमा हेटौँडा– ९ मा रहेको टेस्टी म म एन्ड फास्टफुड खाजाघरबाट पक्राउ गरेको छ ।

पक्राउ परेका सुनारलाई जिल्ला प्रहरी कार्यलय मकवानपुरमा राखी थप अनुसन्धान थालिएको प्रहरीले जनाएको छ ।