जवलाखेल । नेपाली कांग्रेसका सांसद समेत रहेका पूर्वअर्थराज्यमन्त्री उदयशम्शेर राणाले दक्षिणी ललितपुरका बाढी, पहिरोबाट समस्यामा परेका जनताको पीरमर्का बुझ्ने प्रयास गरेका छन् ।

सोमबार कांग्रेसका स्थानीय नेताहरूसहित राणाले बाढी र पहिरोबाट प्रभावित व्यक्तिहरूका मागको सुनुवाई गरेका छन् ।

नेता राणाले भने, ‘बडादशैँ नजिकिँदै गर्दा, धेरैजसो नागरिक गाउँ फर्किंदै हुनुहुन्छ । केही दिनअघि आएको बाढीपहिरोले बाटाहरूमा क्षति पु¥याएको छ ।’

बिर्खेधारा–दलचोकी–शंखु– कान्तिलोकथ–टीकाभैरव–तीनपाने–छवेली–बगुवा र टीकाभैरव–देवीचौर–घुसेल मोटरबाटोहरूको नेता राणाले स्थलगत अवलोकन गरेका छन् ।

यी सबै मार्गमा एकतर्फी ट्रयाक खुलेको छ । मंगलबारदेखि बगुवाको पुलको अस्थायी मर्मत गरी साना सवारी साधनहरू मकवानपुर–ललितपुर मार्गमा संचालनमा ल्याउने तयारी भइरहेको छ ।

उनले भने, ‘मोटरबाटो निर्माण र बत्ती विस्तारमा स्थानीय साथीहरूको अथक सहयोग देख्दा हृदयदेखि कृतज्ञता महसुस गरेको छु ।’

गोदावरी नगरपालिका–७ देवीचौरमा राहत वितरण कार्यक्रममा पनि नेता राणा सहभागी भएका छन् । पीडित परिवारलाई नेता राणाले गहिरो समवेदना प्रकट गरेका छन् ।

दक्षिणी ललितपुरमा कांग्रेसका सांसद राणाले स्थलगत अनुगमन गरेर जनताको गुनासोहरू संकलन गरेका छन् ।