काठमाडौं । माओवादी केन्द्रका नेता नारायणकाजी श्रेष्ठले बाम गठबन्धनलाई असर पर्ने गरेर अभिव्यक्ति नदिन एमाले र माओवादीका नेता तथा कार्यकर्ताहरूलाई निर्देशन छन् ।

निर्वाचनको मतपरिणाम अन्तिम चरणमा आइरहेका बेला माओवादी केन्द्रका केही नेताहरूले एमालेसँगको पार्टी एकीकरण विरुद्ध अभिव्यक्ति दिन थालेपछि श्रेष्ठले धैर्यता राखेर अभिव्यक्ति दिन आग्रह गरेका हुन् । नेता श्रेष्ठले बिहीबार ट्वीट गर्दै बाम गठबन्धनलाई असर पर्ने गरेर कुनै पनि आरोप प्रत्यारोप नगर्न भनेका हुन् ।

‘माओवादी केन्द्र र एमालेका सबै नेता कार्यकर्ताहरूलाई जिम्मेवारी बोध सहित धैर्यता कायम गर्न र पार्टी एकता वा वामगठबन्धनको भबिश्यसँग जोडिने गरी कुनै आशंकाजन्य आरोप प्रत्यारोप नगर्न विशेष अनुरोध गर्दछु’, श्रेष्ठले ट्वीट गर्दै भनेका छन्, ‘हाम्रा कतिपय मतभेद र कुनै नयाँ कुरा भए छलफलद्वारा समाधान गरौं ।’

माओवादी केन्द्र निकट योङ् कम्युनिष्ट लिग (वाईसिएल)का अध्यक्ष दीपशिखाले माओवादी आन्दोलन र सिद्धान्तबारे एमालेका अध्यक्ष केपी ओलीले दिएको अभिव्यक्तिको विरोध गरेका छन् । त्यसपछि एमाले र माओवादीका नेताहरूबीच आरोप प्रत्यारोप चलेपछि माओवादीका नेता श्रेष्ठले सबैलाई संयम हुन आग्रह गरेका हुन् ।

नयाँ सरकार बनेको केही समय लगत्तै एमाले र माओवादी केन्द्रबीच पार्टी एकीकरणको चर्चा रहेको छ ।