काठमाडौं । जिल्ला प्रहरी कार्यालय रुपन्देहीका प्रहरी प्रमुख एसपी श्याम ज्ञवालीले प्रहरीको अत्याधिक खोजी सूचीमा रहेका मनोज पुनका बारेमा आफूहरूलाई सिआइबीले आइतबार सूचना दिएपछि हाइअर्लटमा बसेर खोजतलास गरेको बताएका छन् ।

इन्काउन्टरबारे फोनमा कुरा गर्दै एसपी ज्ञवालीले भने, ‘नेपाल प्रहरीको सिआईबीले हामीलाई आइतबार मनोज पुन र उसको साथी रुपन्देही छिरेको सूचना दिएको थियो । त्यसपछि प्रहरी परिचालन गरेर उसका बारेमा सबै सूचना संकलन भएको थियो । खोजी कार्य रहेकै बेला आज बिहान गोली लागेर मनोज पुन र सोम आलेको मृत्यु भएको छ ।’

एसपी ज्ञवालीले भने, ‘सिआईबीका डिएसपी अंगुर जिसीको कमाण्डमा खोजेर पक्राउ गर्ने क्रममा बुधबार बिहान साढे तीन बजेतिर देवदह– ४ भवानीपुरमा मनोज पुन र उसको साथी सोम ओलेले प्रहरीमाथि गोली प्रहार गरेको थियो । प्रहरीले जवाफी कारबाही गर्ने क्रममा पुन र आले घाइते भए । उपचारका क्रममा उनीहरूको मृत्यु भएको छ ।’

रुपन्देही जिल्लामा फेरि पनि मनोज पुन समूहले कुनै ठूलो आपराधिक घटना गर्दैछ भन्ने सूचना आफूहरूलाई सिआईबीले गत आइतबार दिएपछि सर्तक भएको एसपी ज्ञवालीको भनाइ छ । त्यसपछि सिआईबीको प्राधिविक र अन्य सहयोगमा पुन र उसको साथी आलेमाथि कारबाही गर्न सकिएको उनले बताए ।

तीनदिन अगाडि मनोज पुन रुपन्देहीमा छिरेको एसपी ज्ञवालीले बताएका छन् । तर, मनोज पुन भारतबाट रुपन्देही छिरेको हो वा अन्य जिल्लाबाट आएको भनेर अनुसन्धान जारी रहेको बताए । उनले भने, ‘मनोज पुन रुपन्देहीमा कताबाट छिरेको हो भनेर अनुसन्धान भइरहेको छ । मलेसियाबाट भारत आएको र त्यसपछि रुपन्देही प्रवेश गरेको हुन सक्ने प्रारम्भीक अनुमान छ ।’

निर्माण व्यवसायी महासंघका अध्यक्ष शरदकुमार गौचन, युवा संघ रुपन्देहीका तत्कालीन अध्यक्ष दुर्गा तिवारी र २ महिनाअघि रुपन्देहीकै काठ व्यापारी वसन्त पौडेलको हत्या पुनले नै गराएको प्रहरीको निष्कर्ष छ ।

३० वर्षीय मनोज पुन रुपन्देही जिल्लाको देवदह नगरपालिका–६ निवासी हुन् । उनको वास्तविक नाम मनोज बुढामगर हो । पुन कुनै बेला नेकपा (एमाले)को ‘युथ फोर्स रुपन्देही क्षेत्र नम्बर–१ का कोषाध्यक्ष थिए । संगठनमा रहँदा पनि उनले गुण्डागर्दी गर्ने, फिरौती माग्ने तथा धम्काउने जस्ता कामलाई निरन्तरता दिँदै आएका थिए । उनी स–साना अपराध गर्दागर्दै देवदह क्षेत्रमा ठेक्कापट्टाको काममा समेत संलग्न भएका थिए ।