काठमाडौं । प्रमुख विपक्षी दल नेपाली कांग्रेसले निर्वाचनका बेला असहयोग र अन्तरर्घात गर्ने नेता तथा कार्यकर्तामाथिको छानविन सुरु गरेको छ ।

ललितपुरस्थित पार्टी मुख्यालयमा शुक्रबार बसेको कांग्रेसको केन्द्रीय अनुशासन समितिको बैठकले आधिकारिक उम्मेदवारलाई असहयोग गर्ने नेता तथा कार्यकर्तालाई कारबाही गर्ने निर्णय गरेको हो ।

‘तेस्रो चरणमा सम्पन्न भएको प्रदेश नं. २ को स्थानीय तहको निर्वाचन तथा मुलुकभर सम्पन्न प्रदेश सभा र प्रतिनिधि सभाको निर्वाचनमा पार्टीका आधिकारिक उम्मेदवारविरुद्ध असहयोग र अन्तर्घात गरेको सम्बन्धमा केन्द्रीय अनुशासन समिति समक्ष आवश्यक प्रमाण सहित २०७४ चैत १५ गतेभित्र प्राप्त हुन आएका उजुरीहरू उपर मात्र छानविन गर्ने’, बैठकपछि जारी विज्ञप्तिमा भनिएको छ ।

कांग्रेसले चैत १५ गतेसम्म अन्तर्घात र असहयोग गर्नेहरू विरुद्ध उजुरी दिन पनि आग्रह गरेको छ । समितिको यो निर्णयले अन्तर्घात गरेर पार्टीका आधिकारिक उम्मेदवारहरू हराउन भूमिका खेल्ने नेता तथा कार्यकर्ता तनावमा परेका छन् ।