हेटौँडा । जिल्ला प्रहरी कार्यालय मनकवानपुरको हिरासतबाट फरार मिलन पाण्डेलाई काठमाडौंमा पक्राउ गरिएको छ ।

२०६८ साल मंसिर १९ गते बिहान साढे ९ बजे रातोमाटे चेकपोष्टबाट लागूऔषधसहित पक्राउ परेका पाण्डे हिसातको झ्यालको सरिया काटेर फरार भएका थिए ।

फरार रहेका पाण्डेलाई फागुन २२ गते मकवानपुर र महानगरीय प्रहरी वृत, महाराजगंजबाट खटिएको टोलीले गोंगबुको बानियाटारबाट पक्राउ गरेको बुधबार जारी विज्ञप्तिमा उल्लेख छ ।

छ वर्ष अगाडि पक्राउ परेर हिरासतबाट फरार रहेका पाण्डेलाई प्रहरी टोलीले खोजतलास गर्दै आएको थियो । पाण्डे ७५ दिनसम्म हिरासतमा बसेर फरार भएका थिए ।

यसैबीच मकवानपुर प्रहरीले अफिम खेती नष्ट गरेको छ । बकैया गाउँपालिका वडा नं. ७ का बिभिन्न स्थानमा लगाईएको अफिम खेती नष्ट गरिएको जिल्ला प्रहरी कार्यालय मकवानपुरका प्रमुख एसपी विकासराज खनालले जानकारी दिए । अफिम खेती १२ कठ्ठामा लगाइएको थियो ।