काठमाडौं । संखुवासभा जिल्लाको मादी नगरपालिका– १ उमलिङमा सात जनाको सामूहिक हत्या प्रकरणमा प्रहरीले दोषीलाई पक्राउ गरेको छ ।

पक्राउ पर्नेमा लोकबहादुर कार्की रहेको प्रहरीले जनाएको छ । दोषी लोकबहादुरले तेजबहादुर कार्कीसँग ऋण लिएका थिए । तेजबहादुरले उक्त रकमको ब्याज लिएको झोँकमा सामूहिक हत्या गरेको खुलेको प्रहरीले जानकारी दिएको छ ।

सामूहिक हत्या घटनाका पछाडि आर्थिक लेनदेन मुख्य कारण भएको अनुसन्धानमा संलग्न प्रहरी अधिकारीले बताएका छन् ।

लोकबहादुरकी आमा देवीमाया कार्कीको उपचारको लागि तेजबहादुरले केही पैसा ऋण दिएका थिए ।

पैसाको ब्याजसमेत लिएपछि तेजबहादुर र लोकबहादुबीच मनमुटाब भएको प्रारम्भीक अनुसन्धानका क्रममा खुलेको छ ।

आरोपित लोकबहादुरकी आमाको गत वर्ष २६ चैतमा उपचारकै क्रममा धरानमा निधन भएको थियो ।

सोही बेला लोकबहादुरले तेजबहादुरको परिवारसँग उपचारको लागि ऋण मागेको खुलेको हो ।

लोकबहादुरको मानसिक अवस्थासमेत राम्रो नहुँदा तेजबहादुरको परिवारको सामूहिक हत्यासम्म पुगेको प्रहरीको भनाइ छ ।

घटनाको अनुसन्धानका खटिएका एक प्रहरीले लोकबहादुरले हत्या स्वीकार गरिसकेको दाबी गरेका छन् ।