काठमाडौं । प्रहरी प्रधान कार्यालय, केन्द्रीय अनुसन्धान ब्यूरो (सीआईबी) महाराजगञ्जको टोलीले बैंकिङ कसुर मुद्दामा सजाय पाएर फरार रहेका दुई जनालाई पक्राउ गरेको छ ।

सीआईबीले काठमाडौं महानगरपालिका–२९ बस्ने ३६ वर्षीय विनम श्रेष्ठ र काठमाडौं महानगरपालिका–१४ बल्खु बस्ने धादिङ त्रिपुरासुन्दरी गाउँपालिका–१ घर भएका ४८ वर्षीय प्रकाश श्रेष्ठलाई मंगलबार पक्राउ गरेको विज्ञप्तिमा उल्लेख छ ।

सीआईबीबाट खटिएको प्रहरीले विनमलाई काठमाडौंको असनबाट पक्राउ गरेको थियो । प्रकाशलाई रुपन्देहीमा फेला पारी पक्राउ गरेको प्रहरीले उल्लेख गरेको छ ।

विनमलाई अदालतबाट ७ दिन कैद र १७ लाख ६५ हजार रुपियाँ जरिवाना फैसला गरेको छ ।

प्रकाशलाई ५ दिन कैद र ११ लाख ५० हजार जरिवाना अदालतले फैसला गरेको थियो ।

उनीहरूले आफ्नो खातामा पर्याप्त मौज्दात रकम नभएको भन्ने जानी–जानी पीडितहरूलाई झुक्यानमा पारी बैंक अफ काठमाडौं र सिद्धार्थ बैकको चेक दिइ बैंकिङ कसुरजन्य अपराध गरेको ठहर भएको थियो ।

उनीहरूलाई फैसला कार्यान्वयनको लागि जिल्ला अदालत काठमाडौंमा पेश गरिएको उक्त ब्यूरोले जनाएको छ ।