कर्माछिरिङ शेर्पा, युवा नेता, नेपाली कांग्रेस

नेपाली कांग्रेसका महाधिवेशन प्रतिनिधि एवम् युवा नेता कर्माछिरिङ शेर्पाले पनि प्रतिनिधि सभा निर्वाचनमा उम्मेदवार बन्ने संकेत गरेका छन् । काठमाडौंको बुढानिलकण्डमा बस्दै आएका शेर्पा कांग्रेस नेता एनपी साउद नेविसंघको अध्यक्ष रहेका बेला केन्द्रीय सदस्य थिए । बालकृष्ण खाण अध्यक्ष रहेका बेला नेपाल तरुण दलको केन्द्रीय सदस्य र केन्द्रीय कार्यालयको कार्यालय सचिव भएर पनि काम गरिसकेका छन् । मंसिर ४ गते प्रतिनिधि सभा र प्रदेश सभाको निर्वाचनको मिति घोषणा भएपछि युवा नेता शेर्पाले प्रतिनिधि सभातर्फ टिकटका लागि पार्टीमा पहल गर्ने तयारी गरेका छन् । शेर्पा खेलकुद क्षेत्रका चर्चित व्यक्ति पनि हुन् । सोही विषयमा कांग्रेसका युवा नेता शेर्पासँग हाम्रा सम्वाददाता विमल योगीद्वारा गरिएको कुराकानीको सम्पादित अंश प्रस्तुत गरिएको छ ।

चुनावमा उम्मेदवार बन्ने कि नबन्ने ?

पार्टीको इमान्दार सिपाहीको रुपमा अहिलेसम्म निरन्तर रुपमा काम गरिरहेको छु । नेविसंघको तलैदेखि केन्द्रीय सदस्यसम्म भएको छु । त्यस बेला नेविसंघमा मेरो अध्यक्ष एनपी साउद दाई हुनुहन्थ्यो । बालकृष्ण खाणको पालामा केन्द्रीय कार्यालयको सचिव थिएँ । खेलकुदका विभिन्न पदमा बसेर काम गरेको छु । महाधिवेशनबाट पार्टीको पटक/पटक जिम्मेवारी लिएको छु ।
पार्टीमा लागेको पनि धेरै भइसकेको छ । ०४५ सालदेखि निरन्तर कांग्रेसको राजनीतिमा सक्रिय छु । ३०/३५ वर्ष भइसक्यो । पार्टीले अहिलेसम्म कुनै पनि जिम्मेवारी दिएको छैन ।

अहिलेको आवश्यक्ता भनेको नेपाली कांग्रेसमा जनताको चाहना के छ ? भने पार्टीमा योगदान दिएको फ्रेस नेताहरू, जनताप्रति केही गर्न सक्ने नेताहरू आकांक्षाहरू बढिरहेको छ ।

यस पटक कांग्रेसले धेरैभन्दा धेरै उम्मेदवारहरू फ्रेस अर्थात जनताको गुनासो नभएकाहरू दिँदा राम्रो हुन्छ जस्तो लाग्छ । पार्टीले जिम्मेवारी दिएको खण्डमा प्रतिनिधि सभाको चुनावमा पार्टीले जुनसुकै क्षेत्रमा जिम्मेवारी दिएमा म चुनाव लड्न तयार छु । पार्टीले खटाएको खण्डमा, पार्टीले अह्राएको खण्डमा, पार्टीले जिम्मेवारी दिएको खण्डमा चुनाव लड्नको लागि तयार छु ।

तपाईको निर्वाचन क्षेत्र कहाँ हुन्छ ?

मैले तोकेर माग्नेभन्दा पनि पार्टीले विचार गरेर मलाई जिम्मेवारी दिने हो । पार्टीका ठूला (वरिष्ठ) नेताहरू रहेको क्षेत्रमा मैले निर्वाचन लड्ने कुरा राख्नु पनि भएन । पार्टीले काठमाडौं उपत्यकाभित्रकै कुनै पनि क्षेत्र दियो भने पनि म निर्वाचन लड्न तयार छु । जित्ने विश्वास पनि छ । काठमाडौं उपत्यकाभित्र फ्रेस नेताहरूलाई टिकट दिनुपर्छ भन्ने सुझाव छ ।

टिकटका लागि अब के गर्नु हुन्छ ?

मलाई टिकट दिनै पर्छ भन्ने पक्षमा छैन । म पनि धेरै वर्ष पार्टीमा लामो समयदेखि काम गरेको हुनाले हामी जस्ता फ्रेस व्यक्तिलाई पनि टिकट दिँदा राम्रो हुन्छ । राष्ट्रिय, अन्तर्राष्ट्रिय क्षेत्रमा नाम राखेको छु । कुनै दाग लागेको छैन । इज्जत राखेर काम गरेको छु ।

तपाईलाई पार्टीले प्रदेश सभातर्फ उम्मेदवार बन्न निर्देशन दियो भने के गर्नु हुन्छ ?

पार्टीले त्यस्तो भन्ला जस्तो लाग्दैन । प्रदेश सभातर्फ धेरै उम्मेदवारहरूको सूची छ । प्रदेश सभातर्फ उम्मेदवार बन्नेबारे मैले सोँच बनाएको छैन ।

कांग्रेसले प्रतिनिधि सभाको प्रत्यक्षतर्फ टिकट छैन । समानुपातिकमा बस्नुस् भन्यो भने के गर्नु हुन्छ ?

पाइयो भने सकेम्म प्रत्यक्षतर्फ चुनाव लड्ने हो । पार्टीले समानुपातिकमा बस्न भनेर समानुपातिकतर्फको चुनावमा भाग लिन निर्देशन दिएमा मैले मान्नै पर्ने हुन्छ ।

स्वतन्त्र र नयाँ पुस्ताले जित्छ भन्छन् । यस्तो अवस्थामा तपाईको एजेण्डा के हुन सक्छ ?

नेपाली कांग्रेसको सिद्धान्त एकदमै राम्रो छ । कांग्रेसको सिद्धान्तलाई साँच्चिकै रुपमा व्यवहारमा उतार्ने आँट चाहिन्छ । वीपी कोइरालाले परिकल्पना गरेको प्रजातान्त्रिक समाजवादमा हामीले प्रजातन्त्रमा मात्रै अभ्यास गर्‍यौं । आर्थिक समाजवाद अहिलेसम्म हामीले लागू गर्न सकेका छैनौं ।

नेपालको विकासको हरेक मोडल समाजवादी अर्थनीति आकर्षित गर्ने खालको आर्थिक नीति बनाउनुपर्छ । नेपालले धेरै कुरामा लगानी गरेर सक्दैन । नेपालको लगानीको प्राथमिकता कृषि, पर्यटन र जलस्रोत यो तीन वटा उद्योगलाई राष्ट्रिय गौरवको योजनाका रुपमा लग्न सक्यौं भने हामी नेपाल आर्थिक रुपले धेरै समृद्ध हुन्छ ।

कृषिमा आत्मनिर्भर हुनको लागि हामीसँग जमीन छ । त्यसको उपयोग नीति अहिलेसम्म हामीले लागू गर्न सकेका छैनौं । कृषिको अनुदान, किसानलाई सहुलियत दिने काम अहिलेसम्म गर्न सकेका छैनौं ।

पर्यटन नेपालको हरेक क्षेत्र उपयुक्त छ । पर्यटनमा मैत्रीपूर्ण लगानी गर्ने वातावरण छैन । सरकारको नीतिमा लचकता ल्याउनुपर्छ । पर्यटन व्यवसायलाई उत्साहित गर्ने खालको कार्यक्रम ल्याउनुपर्छ । जसले धेरैभन्दा धेरै पर्यटकहरू नेपालमा भित्र्याएर विदेशी मुद्रा कमाउने ठूलो स्रोत विकास गर्नुपर्छ ।

जलस्रोत मुख्य मेरुदण्ड हो । ८३ हजार मेगावाट विजुली हामीले उत्पादन गर्न सक्ने क्षमता छ । अहिले पनि बेलाबेला नेपालमा लोडसेडिङको समस्या छ । यो दुर्भाग्यको कुरा हो । कम्तिमा २० देखि ३० हजार मेगावाट विजुली उत्पादन गरेर नेपाललाई ग्यासको आयात बन्द गर्न सकिन्छ । पेट्रोल र डिजेललाई ८० प्रतिशतसम्म विस्थापित गरेर आयात कम गर्न सकिन्छ । विदेशी मुद्रा भित्र्याउन सकिन्छ ।