काठमाडौं । उपभोक्तालाई ठगी गरेपछि भाटभटेनी सुपर मार्केट कारबाहीमा परेको छ ।

मंगलबार हेटौँडास्थित भाटभटेनी सुपरमार्केटलाई ठगीको आरोपमा साढे दुई लाख रुपियाँ जरिवाना गरिएको छ ।

मकवानपुरका सहायक प्रमुख जिल्ला अधिकारी हरिदत्त कँडेलको नेतृत्वमा रहेको अनुगमन टोलीले भाटभटेनी सुपर मार्केटलाई २ लाख ५० हजार रुपियाँ जरिवाना तिराएको छ ।

भाटभटेनी सुपर मार्केट हेटौँडाको अनुगमनका क्रममा उपभोक्तालाई झुक्याएर ठगी गरेको पाइएपछि कारबाही गरिएको सहायक प्रमुख जिल्ला अधिकारी कँडेलले बताएका छन् ।

राखिएको उत्पादनको बिलबिजकमा गलत विवरण समावेश गरी उपभोक्ता ठगी गरेको, उत्पादन तथा उपभोग मिति उल्लेख नगरिएको चिनी र पुनः प्याकिङ गरेका नुनका प्याकेटहरू बिक्रीका लागि राखिएको पाइएको कँडेलले बताए ।

पुनः प्याकिङ गरिरहेको अवस्थामा उत्पादन र उपभोग मिति उल्लेख नभएको चिनी, साल्ट ट्रेडिङ कर्पोरेसनको आयो नुन र उत्पादन मिति उल्लेख नभएको फेस माक्स अनुगमन टोलीले बरामद गरेको छ ।

न्यास्लेको कफीको उल्लेखित मूल्यभन्दा बढीको बिलबिजक जारी गरी बिक्री गरेको फेला पारेको छ । भाटभटेनीबाट बरामद गरेका खाद्य वस्तुहरू बिक्री वितरणमा पनि रोक लगाएको छ ।

भाटभटेनीबाट बरामद भएको ५० किलोको ३० बोरा र ९२ थान (१८४ किलो) चिनी, २२ किलो नुन, नेभियाको २३ थान फेसवास, ४४ थान बडी लोसन, ५९ थान टोनर, १०१ थान लोसन शिलबन्दी गरेको छ ।

भाटभटेनी सुपर मार्केटले उपभोक्ता ठगी गर्ने गरेको धेरै लामो समयदेखि गुनासा आइरहेका छन् । बेलाबेला भाटभटेनी सुपर मार्केट विवादमा पर्ने गरेको छ ।