काठमाडौं । अर्थमन्त्री डा.प्रकाशशरण महतले बैंक तथा वित्तीय संस्थाहरूले छिट्टै ब्याजदर घटाउने बताएका छन् ।

शनिबार काठमाडौंमा आयोजित कार्यक्रममा डा.महतले चर्को ब्याजदर घटाउनका लागि आफूले नेपाल राष्ट्र बैंकलाई भनेको बताए । उनले आगामी आर्थिक वर्षको मौद्रिक नीतिमा व्याजदर घटेर आउने बताए ।

अर्थमन्त्री डा.महतले कोभिड लगायतका समस्याका कारण मारमा परेका उद्योगी, व्यवसायीहरूलाई बैंकको ब्याजदर घटेपछि ठूलो राहत हुने बताएका छन् ।

‘यो अहिलेको जुन ब्याजदर छ । त्यो जाँदा छ’, डा.महतले भने, ‘त्यस कारण त्यस कारण यो पोलिसी रेट घटाउने र यो पुनर्ताजकीकरण गर्नका लागि पनि त्यो सुविधा दिनुपर्छ भन्ने कुरा पनि मैले नेपाल राष्ट्र बैंकमा राखेको छु ।’

उनले भने, ‘सायद केही न केही सम्बोधन होला । त्यसले गर्दाखेरी यो ब्याजदर घटेर त्यसबाट पनि जो ऋण लिएर ठुलो लगानी यो क्षेत्रमा भएको छ । केही न केही राहत पुग्नेछ भन्ने मलाई लागेको छ ।’

अर्थमन्त्री डा.महतले सरकारले आन्तरिक उत्पादनलाई बढवा दिने नीति लिएको उल्लेख गर्दै आन्तरिक बस्तुहरूको खपतमा जोड दिन उपभोक्तालाई आग्रह गरेका छन् ।

बैंक तथा वित्तीय संस्थाहरूले चर्को ब्याजदर असुली गरिरहेको गुनासो आइरहेको छ । अर्थमन्त्री डा.महतले व्याज घटाउने कुरा गरेपछि ऋणिलाई राहत मिल्नेछ ।