काठमाडौं । नेपाल उद्योग वाणिज्य महासंघले निर्माण व्यवसायीहरूको आन्दोलनमा ऐक्यवद्धता जनाएको छ ।

बुधबार विज्ञप्ति जारी गरेर महासंघले निर्माण व्यवसायीहरूको जायज माग सुनुवाइ नभए मुलुकको अर्थतन्त्रमा गम्भीर समस्या आउने जनाएको छ ।

‘महासंघको सदस्य नेपाल निर्माण व्यवसायी महासंघद्वारा विभिन्न माग राखेर भइरहेको आन्दोलनप्रति महासंघको ध्यानाकर्षण भएको छ’, विज्ञप्तिमा भनिएको छ ।

‘कूल गार्हस्थ्य उत्पादनमा ठूलो योगदान रहेको यस क्षेत्रका जायज माग सुनुवाइमा भइरहेको ढिलाइले निर्माण मात्र नभई अर्थतन्त्रमा नै समस्या पर्ने देखिएको छ’, महासंघले भनेको छ ।

निर्माण व्यवसायीले निर्माण कार्य सम्पन्न गरेपनि भुक्तानी नहुँदा वित्तीय प्रणाली र समग्र अर्थतन्त्रमा नै नकारात्मक प्रभाव परेको महासंघले जनाएको छ । सरकार संवेदनशील हुनु जरुरी रहेको महासंघले जनाएको छ ।

विकास निर्माण र सर्वसाधारणको जीवनयापनसँग समेत जोडिएका परियोजना रोकिँदा सरकारको पुँजीगत खर्च हुन नसकेको विज्ञप्तिमा उल्लेख छ । जनताले समेत विकासको सुविधा पाउन नसकेको महासंघले जनाएको छ ।

निर्माण, उद्योग र थोक व्यापार नकारात्मक रहँदा अर्थतन्त्रमन्दीमा गएको भन्दै त्यसबाट बैंक वित्तीय संस्था, सिमेन्ट, छड जस्ता निर्माण सामग्री उत्पादक र सरकारको राजश्वमा समेत गम्भीर असर परेको महासंघले जनाएको छ ।

गत आर्थिक वर्षमा राजस्व १३ प्रतिशतले घट्नुका साथै उद्योगहरू करिब ३० देखि ३५ प्रतिशतको क्षमतामा चल्न बाध्य भएको महासंघले जनाएको छ ।

आयोजना सम्पन्न हुँदा समेत सरकारले भुक्तानी नदिएपछि समस्यामा परेका निर्माण व्यवसायीहरू चरणबद्ध आन्दोलनमा छन् । निर्माण व्यवसायीहरूका मागप्रति सरकारले गम्भीर भएर चासो दिएको छैन ।