काठमाडौं । एमाले–माओवादी केन्द्र गठबन्धन सरकारले विभिन्न ८ देशका लागि राजदूतहरू सिफारिस गरेको छ ।

सिंहदरबारमा शुक्रबार बसेको मन्त्रिपरिषद बैठकले रिक्त रहेका ८ राजदूत पदमा विभिन्न व्यक्तिलाई भागबण्डाको आधारमा नियुक्ति गरिएको हो । केही दिन अगाडि एमाले–माओवादी गठबन्धन सरकारले राजदूतहरूलाई फिर्ता बोलाउने निर्णय गरेको थियो ।

सरकारले भारतका लागि पूर्वमुख्यसचिव लोकदर्शन रेग्मी सिफारिस गरेको छ । एमाले, माओवादी र जसपाको बन्नेहरूको नाम सिफारिस भएको छ ।

अमेरिकाका लागि पूर्वसचिव चन्द्र घिमिरे सिफारिस भएका छन् । दक्षिण कोरियाका लागि सुशील प्याकुरेल सिफारिस भएका छन् । प्याकुरेल पूर्वराष्ट्रपति विद्यादेवी भण्डारीको तत्कालीन समयमा सल्लाहकार थिए ।

डेनमार्कका लागि सुम्निमा तुलाधर, मलेसियाका लागि नेत्रप्रसाद तिमिल्सिना, बेलायतका लागि बिजन पन्त, साउदी अरेबियाका लागि अबुसुफ्यान खान मुसलमान र स्पेनका लागि पुष्पराज राजकर्णिकार सिफारिस भएका छन् ।

राष्ट्रिय स्वतन्त्र पार्टी (रास्वापा)को कोटामा परेका राजदूतहरूको नाम पछि सिफारिस हुनेछन् । रास्वपा राजदूत बनाउने मानिसहरूको खोजतलास गरिरहेको छ । रास्वपाले राजदूतको भागबण्डामा २ जना राजदूत पाएको छ ।

मन्त्रिपरिषदबाट सिफारिस भएकाहरूको संसदीय सुनुवाई पूरा भई एग्रिमो आएपछि नियुक्ति हुनेछन् ।