काठमाडौं । नेपाली कांग्रेसका सांसद उदयशम्शेर राणा (जबरा)ले काठमाडौं–निजगढ फास्ट ट्रयाकको खोकनाको जिरो प्वाइन्टबारे रक्षा मन्त्रालयको प्रतिवेदनबारे जानकारी माग गरेका छन् ।

शुक्रबार बसेको प्रतिनिधि सभाको बैठकमा शून्य समयमा बोल्दै सांसद राणाले खोकनामा जिरो प्वाइन्ट राख्ने विषयमा स्थानीयले विराध गरेपछि रक्षा मन्त्रालयले कार्यदल बनाएको र त्यसको रिपोर्टबारे जानकारी माग गरेका हुन् ।

उनले भने, ‘काठमाडौं–निजगढ जोड्ने फास्ट ट्रयाक बाटोमा अहिले तीब्रगतिमा काम भइरहेकोम छ । तर, जिरो प्वाइन्ट खोकनामा राखिएको छ ।’

‘खोकनामा धेरै समयदेखि त्यहाँ विवाद आएको छ । खोकनाका नागरिकहरूले जिरो प्वाइन्ट त्यहाँ राख्न हुँदैन भनेर माग गरिरहेका छन्’, सांसद राणाले भने ।

‘ललितपुर महानगरपालिकाले पनि महानगरभित्र जिरो प्वाइन्ट राख्न आवश्यक छैन भन्ने किसिमको पत्र गृह मन्त्रालयमा पठाइसकेको छ’, उनले भने ।

‘र, गोदावरी नगरपालिका वडा नं. ८ डुकुछापका नागरिकहरूले आवश्यक प¥यो भने जिरो प्वाइन्ट डुकुछापमा राखे हुन्छ भन्ने किसिमको माग गर्दै आएका छन्’, राणाले भने ।

‘अहिले कार्यदल बनेर रिपोर्टहरू रक्षा मन्त्रालयले एउटा रिपोर्ट बनाउन जिरो प्वाइन्टबारे रिपोर्ट बनाउन एउटा कार्यदल गठन गरेको छ’, सांसद राणाले भने ।

‘त्यसको परिस्थिति के छ भन्ने जानकारी सरकारले गराइदिन माग गर्दछु’, कांग्रेसका सांसद राणाले भनेका छन् ।