काठमाडौं । भारतीय विदेशमन्त्री डा.एस.जयशङ्करले नेपालकी परराष्ट्रमन्त्री डा.आरजु राणा देउवालाई स्वागत गर्न पाउँदा खुसी लागेको बताएका छन् ।

सोमबार हैदरावाद हाउसमा भेटवार्ता र छलफलपछि जारी प्रेस नोटमा विदेशमन्त्री डा.जयशङ्करले परराष्ट्रमन्त्री डा.राणालाई भारतको पहिलो औपचारिक विदेश भ्रमण गरिएकोमा खुसी व्यक्त गरेका छन् ।

विदेशमन्त्री डा.जयशङ्करले ऊर्जा, व्यापार, कनेक्टिभिटी र पूर्वाधार विकास लगायतका बहुआयामिक सहयोगका बारेमा परराष्ट्रमन्त्री डा.राणासँग छलफल भएको बताएका छन् ।

भारतीय विदेशमन्त्री डा.जयशङ्करले भनेका छन्, ‘नेपालले भारतमा करिब १००० मेगावाट बिजुली निर्यात गर्ने भएकोमा खुशी लागेको छ । यो एउटा नयाँ कोशेढुङ्गा हो ।’

‘हाम्रो छिमेकी पहिलो नीति र अद्वितीय व्यक्ति–जनता र सांस्कृतिक जडानले हाम्रो सम्बन्धलाई अगाडि बढाउँछ’, परराष्ट्रमन्त्री डा.राणासँगको भेटवार्तापछि विदेशमन्त्री डा.जयशङ्करले भनेका छन् ।

भारतीय विदेशमन्त्री डा.जयशङ्करले परराष्ट्रमन्त्री डा.राणालाई नयाँ दिल्लीस्थित हैदरावाद हाउसमा भव्य स्वागत गरेका छन् । डा.जयशङ्करले परराष्ट्रमन्त्री डा.राणाको स्वागत र सम्मानमा दिवाभोजको आयोजना समेत गरेका छन् ।