काठमाडौं । भैँसेपाटी ‘हनिट्रयाप’ प्रकरणमा ‘मिटरव्याजी’ गणेश उप्रेतीको ठूलो कनेक्सनको तार जोडिएको प्रहरीले आशंका गरेको छ ।

भैँसेपाटी प्रहरी प्रभागकी प्रहरी निरीक्षक विनु शाही निलम्बनमा परेका छिन् । शाहीविरुद्ध पक्राउ पुर्जी जारी भएपछि हाल फरार छिन् । युवती प्रयोग गरेर बलात्कार मुद्दामा फसाउन खोजेको आरोपमा अहिले चार जना ललितपुर प्रहरी हिरासतमा छन् । हनिट्रयाप काण्डमा असोज ९ गते पक्राउ परेका प्रहरी प्रभाग भैंसेपाटीका सहायक हवल्दार महेन्द्र हमाल, सुनसरीको इटहरीकी सुष्मा बिक, ताज मुल इस्लाम र भीमादेवी थापामाथि आपराधिक लाभ र संगठित अपराध मुद्दामा प्रहरीले अनुसन्धान गरिरहेको छ ।

तत्कालीन समयमा डीएसपी भएर दरबारमार्ग प्रहरी वृत्तमा प्रमुख रहेका बेला हालका एसपी कमल थापा र गणेश उप्रेतीको राम्रो सम्बन्ध बनेको थियो । मिटरव्याज लगायत विभिन्न काण्डैकाण्डमा पर्दै आएका गणेश उप्रेतीले एसपी थापासँग निकै राम्रो सम्बन्ध बनाएका हुन् । एसपी थापाले नै मिटरव्याजी गणेश उप्रेतीको सम्बन्ध भैँसेपाटी हनिट्रयाप काण्डमा मुछिएका ताज मुल इस्लामसँग बनाइदिएका थिए ।

मिटरव्याजी गणेश उप्रेतीविरुद्ध तत्कालीन समयमा विदुर शर्माले प्रहरीमा जाहेरी दिएका थिए । गणेश उप्रेतीविरुद्ध विदुर शर्माले २०७८ सालको साउनमा नेपाल प्रहरीको केन्द्रीय अनुसन्धान व्यूरो (सीआईबी)मा जोहरी दिए पनि शक्तिकेन्द्रको आडमा बच्दै आएका थिए । तत्कालीन सीआईबी प्रमुख (एआईजी) सहकुल थापाले मिटरव्याजी गणेश उप्रेतीविरुद्ध विदुर शर्माले दिएको जोहरी लिए पनि दर्ता गरेका थिएनन् ।

सीआईबीको प्रमुखमा तत्कालीन एआईजी धिरजप्रताप सिंह आएपछि मिटरव्याजी गणेश उप्रेतीलाई पाताकसेर पक्राउ गरि मुद्दा चलाएका थिए । गणेश उप्रेती साढे १९ करोडको चेकसहित पक्राउ परेका थिए । सीआईबीले २२ करोड ५१ लाख २१ हजार ९९६ रुपियाँ ठगी गरेको अभियोगसहित मुद्दा चलाएको थियो ।

गणेश उप्रेतीले सफाइ पाए पनि एसपी कमल थापासँग मिलेर विभिन्न काण्डमा सहयोग र संलग्नता भएको देखिएको प्रहरीले जनाएको छ । मिटरव्याजी गणेश उप्रेतीलाई सफाइ दिने न्यायाधीश अम्बिकाप्रसाद निरौलामाथि न्याय परिषदले छानविन गरेको थियो । छानविनमा दोषी ठहर भएपछि अम्बिकाप्रसाद निरौलाले न्यायाधीश पद गुमाउनु परेको थियो ।

मिटरव्याजी गणेश उप्रेती पुनः मुद्दा लाग्न र पक्राउ पर्नबाट जोगिँदै आएका छन् । सीआईबीमा आफूविरुद्ध जाहेरी दिएको झोँकमा गणेश उप्रेतीकै योजनामा एसपी कमल थापासँग मिलेर विदुर शर्मालाई फसाउने षड्यन्त्र गरेको प्रहरीभित्र अनुसन्धान भइरेको छ ।

विदुर शर्मालाई हनिट्रयापमा फसाउने योजनामा वैशाख १९ गते युवती तयार पारेर विदुर शर्मासँग शारीरिक सम्पर्कको वातावरण मिलाउनुका साथै त्यसबापतको १ लाख ५० हजार रुपियाँ गणेश उप्रेतीबाटै लिएको प्रहरी बयानमा उल्लेख छन् ।

युवतीसँग शारीरिक सम्पर्क भएलगत्तैबाट विदुर शर्मा समस्यामा परेका हुन् । त्यसपछि युवतीले प्रहरीमा मौखिक उजुर गरेकी थिइन् ।

व्यापारीलाई बलात्कार मुद्दामा फसाइदिने भन्दै प्रहरी कार्यालयभित्रै ईन्सपेक्टर शाहीकै रोहबरमा ६० लाख रुपियाँ माग भएको थियो । पछि ३० लाख रुपियाँ दिने सहमति भएपछि कुरा मिलेको थियो । जसअनुसार १३ लाख र ७ लाख रुपियाँ गरेर दुई पटकमा भीमादेवी थापाको खातामा २० लाख रुपियाँ रकम जम्मा भएको थियो ।

यसरी असुल गरिएको रकम भीमादेवी थापाको खातामा जम्मा गरिएको प्रहरीको भनाइ छ । यो घटनामा पक्राउ पुर्जी जारी भएका प्रहरी प्रभाग भैंसेपाटीकी तत्कालीन ईन्सपेक्टर विनु शाही र इटहरीका दर्शन पोखरेल भने फरार छन् ।