प्रधान सेनापति सिग्देल भारत भ्रमणमा जाने

काठमाडौं । नेपाली सेनाका प्रधान सेनापति अशोकराज सिग्देल भारत भ्रमणमा जाने भएका छन् ।

मित्रराष्ट्र भारतका स्थल सेनाध्यक्ष जनरल उपेन्द्र द्विवेदीको औपचारिक निमन्त्रणामा प्रधान सेनापति सिग्देलले मंसिर २६ गते भारत प्रस्थान गर्ने कार्यक्रम रहेको विज्ञप्तिमा उल्लेख छ । सिग्देलले मंसिर २९ गतेसम्म भारतको भ्रमण गर्नेछन् ।

भ्रमणको दौरान प्रधान सेनापति सिग्देललाई भारतका राष्ट्रपतिबाट भारतीय सेनाको मानार्थ महारथीको दर्जाबाट सुशोभित गर्नु हुने कार्यक्रम रहेको छ ।

सो अवसरमा प्रधान सेनापति सिग्देलले भारतका उच्च पदस्थ पदाधिकारीहरूसँग भेटघाट गर्नुका साथै ईण्डियन मिलिटेरी एकेडेमीमा तालिमरत अधिकृत क्याडेटहरूको अन्तिम दलेल कवाजमा प्रमुख अतिथिको रूपमा सहभागी हुने कार्यक्रम समेत रहेको छ ।

Published : Wednesday, 2024 December 4, 8:52 pm