काठमाडौं । नेपाल प्रिमियर लिग (एनपीएल) सञ्चालन भइरहेका बेला वेष्टइण्डिजका विश्व प्रख्यात क्रिकेटर ब्रायन लारा काठमाडौं आएका छन् ।

शुक्रबार बिहान लारा छोरी र सहयोगीसहित काठमाडौं ओर्लिएका हुन् । लारालाई त्रिभुवन अन्तर्राष्ट्रिय विमानस्थलमा नेपाल क्रिकेट संघ (क्यान)का पदाधिकारीले भव्य स्वागत गरेका छन् । लारा क्यानको निमन्त्रणामा एनपीएलको पहिलो संस्करण हेर्न काठमाडौं आएका हुन् ।

वेष्टइन्डिजका पूर्वकप्तानसमेत रहेका लाराले एनपीएलका केही खेल हेर्ने र खेलाडीहरूसँग साक्षात्कार गर्नेछन् ।

क्रिकेटर लाराले वेष्टइण्डिजका लागि सन् १९९० देखि २००७ सम्म राष्ट्रिय टोलीबाट खेलेका थिए । उनले वेष्टइण्डिजका लागि एक सय ३१ टेष्ट खेल खेलेका छन् । एक सय ३१ खेलबाट लाराले ११ हजार नौ सय ५३ रन बनाएका थिए । उनले टेस्ट क्रिकेटमा ३४ शतक प्रहार गरेका छन् । लाराले ४८ अर्धशतक प्रहार गरेका छन् ।

टेस्ट क्रिकेटमा एक खेलमै चार सय रन प्रहार गरेर विश्व रेकर्डसमेत उनले बनाएका छन् । लाराले सन् २००४ अप्रिल १२ मा इङ्ग्ल्यान्डविरुद्धको टेस्ट क्रिकेटमा अविजित रहँदै चार सय रन बनाएका थिए ।

लाराले वेष्टइण्डिजका लागि दुई सय ९९ एक दिवसीय खेल खेलेका छन् । एक दिवसीय क्रिकेटमा १९ शतक र ६३ अर्धशतक प्रहार गर्दै उनले १० हजार चार सय पाँच रन जोडेका छन् ।