काठमाडौं । नेपाली कांग्रेसका नेता कृष्णप्रसाद सिटौलाले सबैभन्दा बढी भरोसा गरेको पार्टी कांग्रेस भएको बताएका छन् ।

बिहीबार नेपाली कांग्रेस काठमाडौं क्षेत्र नं. १ को भेलामा सिटौलाले जनताले सबैभन्दा धेरै पत्याएको पार्टी कांग्रेस भएको बताए ।

‘अहिले कांग्रेस र एमालेको सरकार छ । एमाले नेता प्रधानमन्त्री हुनुहुन्छ । हामी पनि सरकारमा छौं । हामी सबैभन्दा ठूलो पार्टी हौं’, उनले भने, ‘संसदमा मात्रै होइन । देशभरकै मूल्यांकनमा हो ।’

उनले भने, ‘जनताले सबैभन्दा बढी पत्याएर ठूलो पार्टी बनाएको हामीलाई नै छ । अहिले पनि जनताको विश्वास हामीमाथि नै छ ।’

नेता सिटौलाले अहिलेको सरकार विशेष परिस्थितिबाट निर्माण भएकाले यसलाई जोगाएर लैजानुपर्ने आवश्यकता रहेको बताएका छन् ।

बनिसकेको सरकारलाई बीचमा भत्किन दिनु नहुने भन्दै सिटौलाले सरकारका नीति र व्यवहारबाट जनताका बीचमा काम गर्नुपर्ने बताए ।

उनले भने, ‘एउटा विशेष परिस्थितिबाट निर्माण भएको सरकार हो यो । यसलाई हामीले जोगाएर लैजानु पनि छ । बनिसकेपछि यसलाई बीचमा भत्किन दिनु पनि भएको छैन ।’

‘यो सरकार जोगाउनका लागि जोगाउने होइन, यो सरकारले गर्ने नीतिहरूबाट, सरकारले गर्ने व्यवहारबाट राज्य सञ्चालनबाट जनताका बीचमा व्यापक काम गर्न सक्नुपर्छ’, कांग्रेस नेता सिटौलाले भने ।

प्रधानमन्त्री केपी ओली कांग्रेसकै बलमा सरकारमा रहेको भन्दै सिटौलाले कांग्रेसकै सहारामा प्रधानमन्त्री बनेकाले ओली एक्लै अघि बढ्न नसक्ने बताए ।

उनले भने, ‘आखिर यो सरकार हाम्रो बलमा छ । केपी ओलीजी प्रधानमन्त्री हाम्रो बलमा हुनुहुन्छ । हाम्रो सहारामा हुनुहुन्छ ।’

सिटौलाले भने, ‘हामी बेगर उहाँ अगाडि एक्लै जान सक्नुहुन्छ भनेर कल्पना पनि गर्न सक्दैनौँ ।’