हेटौँडा । मकवानपुरको हेटौँडामा श्यामसुन्दर तिवारीले सञ्चालन गरेको चण्डिका होटलको २०१ नम्बर कोठामा २८ वर्षीय सरोज शाह मृत अवस्थामा फेला परेका छन् ।

मृत भेटिएका शाहको स्थायी ठेगाना मकवानपुरको राक्सिराङ गाउँपालिका–४ मा रहेको जिल्ला प्रहरी कार्यालय मकवानपुरका प्रहरी प्रमुख (एसपी) विश्वराज खड्काले बताए ।

हेटौंडा उपमहानगरपालिका–१०, बसर्पाकमा रहेको होटलमा शाह ९ दिनदेखि बस्दै आएका थिए । शाहको शव खाटमा पलेँटी कसेर बसेको अवस्थामै मुन्टो घोप्टो परेको स्थितिमा भेटिएको थियो ।

प्रहरीले शाह बस्ने कोठामा सानो प्लेटमा सिक्का पैसा, ड्रग्स जस्तो देखिने सेतो पदार्थ र ब्लेड फेला पारेको जनाएको छ । उनले मादक पदार्थ पनि सेवन गरेको जस्तो देखिएको प्रहरीले प्रारम्भीक अनुमान गरेको छ ।

नाकबाट रगत बगेको अवस्थामा भेटिएका शाह बुधबार साँझ हेटौंडा–४ कमलडाँडामा मादकपदार्थ सेवन गरेर साँझ साढे ६ बजे होटलमा आइपुगेको प्रहरीले जनाएको छ ।

शाहको शवलाई पोस्टमार्टमको लागि हेटौंडा अस्पतालमा राखिएको छ । घटनाबारे अनुसन्धान जारी रहेको एसपी खड्काले बताएका छन् ।