काठमाडौं । काठमाडौं उपत्यका अपराध अनुसन्धान कार्यालय, टेकुले काठमाडौंमा २४ जना भारतीय नागरिकहरूलाई पक्राउ गरेको छ ।

सोमबार राति बुढानीलकण्ठमा प्रहरीले छापा मारेर भारतीय नागरिकहरूलाई पक्राउ गरेको जनाएको छ । उनीहरूले अनलाइन बेटिङ तथा जुवा खेलाउने गरेको प्रारम्भीक अनुसन्धानबाट खुलेको छ ।

प्रहरीले छापा मारेर भारतीय नागरिकहरूसँग २१ थान मोबाइल, ३८ थान ल्यापटप समेत बरामद गरेको उल्लेख गरेको छ ।

भारतीय नागरिकहरूले ३ महिनामा १ अर्ब ६४ करोड ३९ लाख ५७ हजार ३४० रुपियाँ बराबरको अनलाइन जुवा कारोबार गरेको प्रहरी भनाइ छ ।

स्काई एक्सचेन्ज वेबसाइटमार्फत उनीहरूले अनलाइन गेम तथा जुवा खेलाउने गरेका थिए । वेबसाइटमा दिएको सम्पर्क गर्ने माध्यम ह्वाट्स एप, टेलिग्र्राममार्फत विभिन्न व्यक्तिहरूलाई सम्पर्क गरी गेम खेलाउने गरेको अनुसन्धानबाट खुलेको छ ।

चिनियाँ नागरिकहरूले अनलाइन लगायतका विभिन्न अपराध गरेको समाचार आइरहेका बेला भारतीय नागरिकहरूको समूह पनि अनलाइन् गेमको अपराधमा संलग्न रहेको फेला परेको छ ।