काठमाडौं । पूर्वराजा ज्ञानेन्द्र शाहलाई राजगद्दीमा फर्काउने भनेर विदेशी शक्तिबाट झण्डै एक अर्ब रुपियाँ नेपालभित्रिएको चर्चा छ ।

सो रकम लिन राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देन निकट मानिने एक व्यक्ति, राप्रपाका महामन्त्री धवलशम्शेर राणा र पूर्वराजा शाहको सचिवालयका एक उच्च तहका कर्मचारी विदेश गएको स्रोतले जनाएको छ । कथित राजावादीहरूको आन्दोलनका लागि अहिलेसम्म थुप्रै रकम खर्च भइसकेको छ ।

राजावादीको नाममा नेपाल भित्रिएको रकमका विषयमा राप्रपामा छलफल समेत भएको एक नेताले बताएका छन् । धवलशम्शेर राणाले विदेशबाट आएको ठूलो रकम पाएपछि अध्यक्ष लिङ्देनले थाहा पाएपछि राजा ल्याउने आन्दोलन समिति बनाएर आफै संयोजक बनेका थिए । महामन्त्री धवलशम्शेर राणालाई भूमिका नै दिएका छैनन् । भूमिका नपाएपछि धवलशम्शेर राणा पूर्वपञ्च नवराज सुवेदीको समितिमा सदस्य बनेर बसेका छन् ।

विदेशबाट भित्रिएको भनिएको झण्डै एक अर्ब रकम मेडिकल व्यवसायी दुर्गा प्रसाईं र राप्रपाका प्रमुख सचेतक ज्ञानबहादुर शाहीको हातमा परेको छैन । रकमका बारेमा थाहा पाएपछि प्रसाईं र ज्ञानबहादुर शाहीले बबाल गरेका थिए । दुर्गा प्रसाईं र ज्ञानबहादुर शाहीले सो रकमका विषयमा हिसाब किताब माग गरेका छन् ।

आन्दोलनका लागि भन्दै पूर्वराजा ज्ञानेन्द्र शाहले मेडिकल व्यवसायी प्रसाईं र पूर्वपञ्च नवराज सुवेदीलाई केही रकम पनि दिएका छन् । विभिन्न व्यवसायमा पूर्वराजा ज्ञानेन्द्र शाहको अर्बौंको लगानी छ । पूर्वराजा ज्ञानेन्द्र शाहले सो रकम मुलुकमा अस्तव्यस्त बनाउन परिचालन गरेको आरोप पनि छ ।

आन्दोलनकारीका एक नेताका अनुसार बिहीबार पूर्वराजा ज्ञानेन्द्र शाहले दुर्गा प्रसाईंलाई महाराजगञ्जस्थित निर्मल निवासमा बोलाएर रकम दिएका छन् । काठमाडौंमा प्रदर्शन हुनुभन्दा एक दिन अगाडि दुर्गा प्रसाईंले आफ्नो गाडीमा निर्मल निवासबाट बाहिरिएको भिडियोमा देखिएको छ ।