काठमाडौं । तीनकुनेमा प्रदर्शनकारीलाई अराजक, हिंस्रक र उत्तेजक बनाएर भागेका विवादास्पद मेडिकल व्यवसायी दुर्गा प्रसाईं लुकेर बसेका छन् ।

प्रहरीले प्रसाईंलाई पक्राउ गर्न शुक्रबार रातिदेखि खोजतलास जारी राखेको छ । प्रसाईं लुकेर भागेका छन् ।

तीनकुनेमा भएको हिंसात्मक प्रदर्शनको कमाण्डर प्रसाईं हुन् । प्रसाईंलाई पक्राउ गरेर प्रहरीले कारबाही गर्ने जनाएको छ । प्रसाईं लुकेर बस्न सक्ने स्थान र भाग्न सक्ने ठाउँहरूमा प्रहरीले रेकी गरेर खोजतलास गरिरहेको जनाएको छ ।

प्रसाईं शुक्रबार तीनकुनेबाट भागेपछ कथित धर्मगुरू पुस्कर खतिवडासँगै गएका थिए । कार्यक्रमस्थलबाट प्रसाईं खतिवडासँगै निस्किएका थिए । खतिवडाको इमाडोलस्थित घरमा केहीबेर बसेर प्रसाईं फरार भएका छन् ।

प्रहरीले तीनकुने क्षेत्रमा हिंसा गर्न उकासेको अभियोगमा कथित धर्मगुरू खतिवडालाई पक्राउ गरिसकेको छ । खतिवडाको घरबाट भाग्नु अगाडि प्रसाईंले केरा र स्याउ खाएको जिल्ला प्रहरी परिसर ललितपुरका प्रमुख (एसएसपी) श्यामकृष्ण अधिकारीले बताएका छन् । प्रसाईंको मोबाइल पनि अफ गरिएको छ । प्रसाईंको अन्तिम मोबाइल लोकेशन गैरीगाउँ देखिएको प्रहरीले जनाएको छ ।

तीनकुने क्षेत्रको हिंसा गराएको अभियोगमा प्रहरीले रवीन्द्र मिश्र, धवलशम्शेर राणा, स्वागत नेपाल लगायतलाई १५० भन्दा धेरैलाई पक्राउ गरिसकेको छ । कथित जनआन्दोलन समितिका संयोजक नवराज सुवेदीलाई उनकै घरमा प्रहरीले नियन्त्रणमा राखेको छ ।