काठमाडौं । नेपाली कांग्रेसले तीनकुने क्षेत्रमा भएको हिंसाका जिम्मेवारी पूर्वराजा ज्ञानेन्द्र शाहले लिनपर्ने निष्कर्ष निकालेको छ ।

शनिबार बुढानिलकण्ठस्थित सभापति शेरबहादुर देउवाको निवासमा बसेको पदाधिकारी, शीर्ष नेता र पूर्वपदाधिकारीहरूको बैठकले पूर्वराजा शाहले नै हिंसाको स्थिति सिर्जना गरेको निष्कर्ष निकालेको प्रवक्ता डा.प्रकाशशरण महतले बताए ।

बैठकपछि पत्रकारहरूसँग कुरा गर्दै डा.महतले भने, ‘सरकारले पूर्वराजाले नै यो स्थिति बनाएकोले पूर्वराजाको सम्पूर्ण यसको जिम्मेवारी वहाँको छ । वहाँ (पूर्वराजा ज्ञानेन्द्र शाह)कै निर्देशनमा सहभागी भए र जो जो यो घटनामा त्यस्तो खाले अराजक गतिविधिमा जनधनको क्षति पुर्‍याउने गतिविधिमा संलग्न छन् त्यसलाई कानून बमोजिम सख्त कारबाही हुनु पर्दछ भन्ने हाम्रो निष्कर्ष छ ।’

पूर्वमन्त्री समेत रहेका डा.महतले भने, ‘राजावादीको नाममा जुनखालको गतिविधि हिजो भयो । त्यसको समीक्षा गर्‍यौँ । गृहमन्त्रीज्यूले सम्पूर्ण घटना विवरण पनि प्रस्तुत गर्नुभयो ।’

‘त्यसपछि हामी के निष्कर्षमा पुगेका छौँ भने यद्यपि हाम्रो पार्टीले हिजो जुन घटना भयो सञ्चारगृहहरू, पार्टी अफिसहरू, व्यक्तिगत घर र व्यवसायहरू टार्गेट गरिगरी जसरी आक्रमण गरियो’, डा.महतले भने ।

‘अराजक परिस्थिति त्यहाँ देखाइयो । त्यसबारेमा पार्टीले आफ्नो दृष्टिकोण पनि राखिसकेको छ’, डा.महतले भने, ‘फेरि पनि आज त्यसमा समीक्षा गरेर हिजोको घटनालाई हामीले गम्भीर समीक्षा गर्दै त्यसलाई भर्त्सना गरेका छौँ ।’

उनले भने, ‘यो गतिविधिबाट के स्पष्ट हुन्छ भने निरंकुश शासनतर्फ लैजाने मनसायका साथ यो घटना घटेको छ । सिधै यहाँ यहाँ आक्रमण गर्ने भनेर घोषणा भएको छ । ठूलो निजी सम्पत्ति र सार्वजनिक सम्पत्तिको क्षति भएको छ । दुई जनाको मृत्यु भएको छ । अन्य कयौँ घाइते भएका छन् ।’

‘त्यसको सम्पूर्ण जिम्मेवारी पूर्वराजा जसको आयोजनमा यो समिति गठन भयो र त्यसले त्यो आयोजना ग¥यो’, उनले भने, ‘सिधै जुनकिसिमको शान्तिपूर्ण तरिकाबाट हामी प्रस्तुत हुन्छौँ भनेका थिए त्यसको विपरित तोडफोड आगजनी गरेर असुरक्षा र अराजकताको परिस्थिति निर्माण गर्ने र त्यो परिस्थितिबाट फाइदा उठाउँदै सत्ता कब्जा गर्ने मनसायले जाने उहाँहरूको लक्ष्य थियो ।’

‘त्यसको जिम्मेवारी उहाँले लिनुपर्दछ भन्ने निष्कर्ष यो बैठक र छलफलले निकालेको छ’, प्रवक्ता डा.महतले भनेका छन् ।

उनले भने, ‘सँगसँगै पार्टी सभापतिजीको, हाम्रो पार्टीको तर्फबाट संविधान पक्षरत दलहरूसँग, दलहरूका शीर्षस्थ नेताहरूसँग एउटा सर्वदलीय बैठक संविधान पक्षरत पक्षमा उभिएका दलहरूको एउटा बैठक बोलाउनु पर्छ निष्कर्ष निस्किएको छ । र त्यहि किसिमको प्रस्ताव पार्टीको तर्फबाट अन्य दलहरूसँग राख्ने कुराहरू पनि भएको छ । भोलि वा पर्सी नै बैठक हुन्छ ।’

राष्ट्रिय प्रजातन्त्र पार्टी (राप्रपा)ले तीनकुने क्षेत्रको हिंसाको जिम्मेवारी सरकारले लिनुपर्छ भनेर निर्णय गरेको छ नि ? भन्ने प्रश्नको जवाफमा कांग्रेसका प्रवक्ता डा.महतले भने, ‘अराजक गतिविधि वहाँहरू गर्ने, हिंसात्मक गतिविधिमा वहाँहरू संलग्न हुने, सञ्चारगृहमा आक्रमण सिधै फलानो फलानो ठाउँमा जाउ भनेर वहाँहरू गर्ने, सँगसँगै पार्टी अफिसहरू, पार्टी नेतृत्वका घरहरूमा आक्रमण वहाँहरू गर्ने, आक्रमण हुने, अनि जिम्मेवारी सरकारले लिने ? त्यो सम्भव छैन ।’

‘त्यसको विषयमा सरकारबाट संसदमा गृहमन्त्रीज्यूले पनि राख्नु होला । प्रधानमन्त्रीज्यूको तर्फबाट पर्सी संसदमा बोल्ने कुरा छ । यो विषयमा कुरा आउला नै’, डा.महतले भने ।

‘यो सरासर भ्रम सिर्जना गर्ने कोशिष हो । सामाजिक सञ्जालको जमाना संसारले देखिसकेको छ’, उनले भने, ‘कुनै लुकाएर, छिपाएर भ्रम सिर्जना गर्ने कोशिष गर्छ त्यो भ्रम सिर्जना हुनेवाला छैन । त्यसमा वहाँहरू स्पष्ट भए हुन्छ ।’

राप्रपाले प्रहरीले मञ्चमा अश्रुग्यास प्रहार गरेको म्याद गुज्रिएको अश्रुग्यास हानेको भनेर आरोप लगाएको छ नि ? भन्ने प्रश्नको जिज्ञासामा प्रवक्ता डा.महतले भने, ‘त्यो अश्रुग्यासबारे गृहमन्त्रीज्यूबाट डिटेलमा सुन्यौँ । अश्रुग्याँस वहाँहरूले गरिरहेको त्यो सभा भनेको चौरभित्र तीनकुनेमा गर्ने भनिएको कुनै अश्रुग्यास त्यहाँ प्रहार गरिएकै छैन । वहाँहरू सभा गर्ने बहाना मात्रै, सिधै आक्रमण गर्ने किसिमबाट प्रसाईंले गाडी नै जबरजस्ती लैजानु भएको छ ।’

‘सुरक्षाकर्मीलाई नै किच्न खोज्दै लगेको दृष्य सार्वजनिक छ । सरकारको तर्फबाट अश्रुग्यास सभामा फालिएको छैन । पछि जब आगजनी, तोडफोड जसरी अगाडि बढाए त्यसपछि मात्रै अश्रुग्यास प्रहार भएको कुरा गृहमन्त्रीज्यूले राख्नुभएको छ’, कांग्रेसका प्रवक्ता डा.महतले भने ।