काठमाडौं । नेपाली कांग्रेसका सभापति शेरबहादुर देउवाले पूर्वराजा ज्ञानेन्द्र शाहका समर्थकहरूबाट तीनकुने क्षेत्रमा भएको हिंसाको जानकारी गृहमन्त्री रमेश लेखकसँग लिएका छन् ।

शनिबार बुढानिलकण्ठस्थित निवासमा बसेको पदाधिकारी, शीर्ष नेताहरू र पूर्वपदाधिकारीहरूको बैठकमा सभापति देउवाले गृहमन्त्री लेखकसँग घटनाका विषयमा चासो र चिन्ता जनाउँदै जानकारी लिएका हुन् ।

गृहमन्त्री लेखकले बैठकमा जानकारी गराएको विषयवस्तु उदृत गर्दै कांग्रेसका प्रवक्ता डा.प्रकाशशरण महतले भने, ‘त्यो अश्रुग्यासबारे गृहमन्त्रीज्यूबाट डिटेलमा सुन्यौँ । अश्रुग्याँस वहाँहरूले गरिरहेको त्यो सभा भनेको चौरभित्र तीनकुनेमा गर्ने भनिएको कुनै अश्रुग्यास त्यहाँ प्रहार गरिएकै छैन । वहाँहरू सभा गर्ने बहाना मात्रै, सिधै आक्रमण गर्ने किसिमबाट प्रसाईंले गाडी नै जबरजस्ती लैजानु भएको छ ।’

‘सुरक्षाकर्मीलाई नै किच्न खोज्दै लगेको दृष्य सार्वजनिक छ । सरकारको तर्फबाट अश्रुग्यास सभामा फालिएको छैन । पछि जब आगजनी, तोडफोड जसरी अगाडि बढाए त्यसपछि मात्रै अश्रुग्यास प्रहार भएको कुरा गृहमन्त्रीज्यूले राख्नुभएको छ’, डा.महतले भनेका छन् ।

डा.महतले भने, ‘सरकारले पूर्वराजाले नै यो स्थिति बनाएकोले पूर्वराजाको सम्पूर्ण यसको जिम्मेवारी वहाँको छ । वहाँ (पूर्वराजा ज्ञानेन्द्र शाह)कै निर्देशनमा सहभागी भए र जो जो यो घटनामा त्यस्तो खाले अराजक गतिविधिमा जनधनको क्षति पुर्‍याउने गतिविधिमा संलग्न छन् त्यसलाई कानून बमोजिम सख्त कारबाही हुनु पर्दछ भन्ने हाम्रो निष्कर्ष छ ।’

पूर्वमन्त्री समेत रहेका डा.महतले भने, ‘राजावादीको नाममा जुनखालको गतिविधि हिजो भयो । त्यसको समीक्षा गर्‍यौँ । गृहमन्त्रीज्यूले सम्पूर्ण घटना विवरण पनि प्रस्तुत गर्नुभयो ।’