काठमाडौं । नेपाली कांग्रेसका सांसद एवम् राज्य व्यवस्था तथा सुशासन समितिका सभापति रामहरि खतिवडाले देश संकटमा परेको बेला सबै दल एकताबद्ध भएर अघि बढ्नुपर्ने बेला प्रमुख प्रतिपक्षका कारण संसद् अवरुद्ध भएको बताएका छन् ।

आइतबार संसद् भवनबाहिर पत्रकारहरूसँग कुरा गर्दै खतिवडाले देशमा समस्या देखिएको अवस्थामा सांसदहरूले संसदमा एकजुट भएर आफ्ना कुरा राख्ने प्रचलनविपरीत प्रतिपक्ष उभिएको बताए ।

सभामुखले आपत्कालीन समय उपलब्ध गराउने आश्वासन दिँदा पनि विपक्षीले संसद् चल्न नदिएको उनले बताएका छन् ।

‘प्रधानमन्त्रीले सोमबार संसदमा जवाफ दिने गरी सभामुखले जानकारी दिइसक्दा पनि प्रतिपक्षले बैठक अवरुद्ध ग¥यो’, सांसद खतिवडाले भने ।

‘सत्तापक्ष र प्रतिपक्ष आफ्नो ठाउँमा होला । देश अप्ठ्यारोमा परेका बेला सबै सांसदले एकताबद्ध भएर संसदमा कुरा राख्ने प्रचलन छ’, खतिवडाले भने, ‘सभामुखले म समय दिन्छुभन्दा पनि प्रमुख प्रतिपक्षले मानेनन् । हामीले आपत्कालीन समय लिएर सबैले बोल्न पाउनुपर्छ भन्ने माग राखेका थियौं ।’

संसदको बैठकमा सभामुखले प्रधानमन्त्री केपी ओलीले सोमबार उपस्थित हुने जानकारी दिएका थिए । माओवादी, रास्वपासहितका विपक्षीले आइतबारको बैठक चल्न दिएनन् ।

कांग्रेसका सांसद खतिवडाले संविधानको शपथ लिएर आएकाहरूले नै संविधान समाप्त पार्ने खेल खेलेको बताएका छन् । उनले भने, ‘संसदलाई बन्धक बनाएर संविधानमाथि प्रहार गर्न खोजिएको छ ।’