काठमाडौं । जिल्ला प्रहरी परिसर काठमाडौंले पत्रकार सुरेश रजकको पोष्टमार्टमको प्रारम्भ नभएको अवस्थामा नकारात्मक सन्देश प्रवाह गराउने गरी सामाजिक सञ्जालमा सन्देशहरू प्रवाह भएको भन्दै गम्भीर ध्यानाकर्षण भएको जनाएको छ ।

आइतबार परिसरका सूचना अधिकारी समेत रहेका एसपी अपीलराज बोहराले प्रेस विज्ञप्ति जारी गरेर घटनाका सम्बन्धमा वास्तविकता नबुझी विभिन्न सामाजिक सञ्जालमार्फत गलत एवम् भ्रमक समाचार सम्प्रेषण गरी जनमानसमा नकारात्मक सन्देश प्रवाह गराउने व्यक्ति संस्थालाई प्रचलित कानून बमोजिम कानूनी दायरमा ल्याइने चेतावनी दिएका छन् ।

एसपी बोहराले भनेका छन्, ‘चैत्र १५ गते शुक्रबारका दिन भएको अपराधिक घटनाहरूका सम्बन्धमा यस कार्यालयबाट सुक्ष्म अनुसन्धान भइरहेको साथै निज मृतकको पोष्टमार्टम कार्य नै प्रारम्भ भइनसकेको अवस्थामा विभिन्न सामाजिक सञ्जालहरूमा चैत्र १५ गते मारिएका पत्रकार सुरेश रजकको पोष्टमार्टम रिपोर्टमा उनको शरीरमा गोली भेटिएको छ लगायतका शीर्षकहरू राखी सो घटनाका सम्बन्धमा वास्तविकता नबुझी विभिन्न सामाजिक सञ्जालमार्फत गलत एवम् भ्रामक समाचार सम्प्रेषण गरी जनमानसमा नकारात्मक सन्देश प्रवाह गराउने व्यक्ति एवम् संस्थाहरूलाई प्रचलित कानून बमोजिम कानूनी दायरामा ल्याइने व्यहोरा समेत अनुरोध गरिन्छ ।’

एसपी बोहराले भनेका छन्, ‘चैत्र १५ गते राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालद्वारा काठमाडौंको तीनकुने क्षेत्रमा शान्तिपूर्ण प्रदर्शनको लाग पूर्व अनुमति लिइ नवराज सुवेदीको संयोजकत्व र दुर्गा प्रसाईंको अगुवाईमा शान्तिपूर्वक प्रदर्शन गर्ने गरी आयोजित प्रदर्शनका क्रममा सो कार्यक्रमका आयोजक एवम् समर्थकहरूले विभिन्न स्थानमा हिंसात्मक तोडफोड, आगजनी लगायत तीनकुनेस्थित एक घरमा भित्र मानिस भएकै अवस्थामा आगजनी गरी निजको मृत्यु समेत हुनेगरी विभिन्न अपराधिक घटनाहरू घटाएको सम्बन्धमा घटनाको गाम्भीर्यता तथा सत्य तथ्य समेत नबुझी विभिन्न सामाजिक सञ्जालहरूमा भ्रामक एवम् गलत सूचना प्रवाह भइरहेको सन्दर्भप्रति यस कार्यालयको गम्भीर ध्यानाकर्षण भएको छ ।’

पूर्वराजा ज्ञानेन्द्र शाहको निर्देशनमा मतियारहरू नवराज सुवेदी, दुर्गा प्रसाईंहरूले आन्दोलन हिंसात्मक बनाएर फरार भएका थिए । पत्रकार रजकलाई निजी घरको कोठामा थुनेर ताला लगाएर बाहिरबाट आगो लगाउँदा जलेर मृत्यु भएको थियो ।