काठमाडौं । सेलिब्रेटीसहितका मोडलहरूले एउटै र्‍याम्पमा प्रस्तुति दिएका छन् ।

शुक्रबार र शनिबार दारबारमार्गस्थित होटल याक एण्ड यतिमा फेसन शो जोय ‘आइइसी डिजाइनर रनवे’को र्‍याम्पमा सेलिब्रेटी र मोडलले एकसाथ फेसनका नवीनत डिजाइनहरू प्रदर्शन गरेका हुन् ।

दर्शकले भरिभराउ शोमा आइसी कलेजका २०२२ ब्याजका १०२ जना विद्यार्थी डिजाइनरहरूले तयार पारेका फरक फरक पहिरनका डिजाइनहरू २५ सिक्वेलमा मोडलले प्रस्तुत गरेका छन् ।

सेलिब्रेटी भने शो टपरको रुपमा र्‍याम्पमा देखिएका छन् । १४औँ संस्करणको जोय ‘आइइसी डिजाइनर रनवे’मा सेलिब्रेटी तर्फ स्वस्तिमा खड्का, प्रियंका कार्की, नीति शाह, सृष्टि श्रेष्ठ, आना शर्मा, नम्रता श्रेष्ठ, मिस नेपाल प्रतियोगीता प्रियंका रानी जोशी, मिस्टर नेपाल समर्पण जङ्ग कार्की, मोडल सविता कार्की, सोफिया भुजेल, आस्था पोखरेल लगायत र्‍याम्पमा देखिएका छन् । मोडलमा अहिलेका चर्चित महिला तथा पुरुष मोडल सहभागी रहेका थिए ।

भारतको चर्चित अन्तर्राष्ट्रिय कोरियोग्राफर यतिन नरेन्द्र गान्धीको समेतको सहभागिता रहेको शोको म्यानेजमेन्ट जिम्मेवारी नेक्स्ट मोडल्स नेपालले गरेको हो । शो नेपालमा आयोजना हुने अन्य फेसन शोभन्दा भव्य रहेको नेक्स्ट मोडल्स नेपालका सिइयो रवि धमलाले बताए ।

‘आइइसी डिजाइनर रनवे’को मुख्य उद्देश्य नेपाली फेसन डिजाइनरको प्रचारप्रसार गर्दै उनीहरूले डिजाइन गरेका नेपाली फेसनका आकर्षक डिजाइन अन्तर्राष्ट्रियस्तरमा पुर्याउनु रहेको आयोजक आइसी कलेजकी प्रबन्ध निर्देशक शैलजा अधिकारीले बताइन् ।

बिगतका वर्षमा एकदिन आयोजना हुँदै आएको यो फेसन शो यसबर्ष अझै बृहत र भब्य रुपमा आयोजना गरिएको शैलजाको भनाई छ । अर्काे वर्ष सन् २०२३ का विद्यार्थी डिजाइनरका फेसन शो हुने शैलजाले जानकारी दिइन् ।