काठमाडौं । प्रधानमन्त्री केपी ओलीसहित संविधान पक्षधर राजनीतिक दलका शीर्ष नेताहरूको बैठकले तीनकुने घटनाको मुख्य जिम्मेवार पूर्वराजा ज्ञानेन्द्र शाह रहेको निष्कर्ष निकालेका छन् ।

प्रधानमन्त्री ओलीको आह्वानमा आइतबार राति सिंहदरबारस्थित मन्त्रीपरिषद तथा प्रधानमन्त्री कार्यालयमा बसेको बैठकले पूर्वराजा ज्ञानेन्द्रको षड्यन्त्रमा संघीय लोकतान्त्रिक शासन व्यवस्थालाई उल्ट्याउने षड्यन्त्र भइरहेको निष्कर्ष निकालिएको गृहमन्त्री रमेश लेखकले बताए ।

बैठकपछि पत्रकारहरूसँग कुरा गर्दै गृहमन्त्री लेखकले भने, ‘संघीय लोकतान्त्रिक शासन व्यवस्थालाई उल्ट्याउने नेपालको संविधानलाई समाप्त गर्ने गतिविधिहरू भएका छन् । त्यो षड्यन्त्रमूलक गतिविधिको मुख्य जिम्मेवार पूर्वराजा ज्ञानेन्द्र हुन् भन्ने कुरामा सबै दलहरूको एकमत रह्यो ।’

उनले भने, ‘फागुन ७ गतेदेखिका घटना क्रमहरू र पछिल्लो समयमा चैत्र १५ गतेका दिन तीनकुनेमा भएको अमावनीय बरबरतापूर्वक र आततायी प्रवृत्तिको कुनै पनि राजनीतिमा गर्न भन्ने नसुहाउँदा खालका घटनाहरू भएका छन् ।’

‘घरमा मानिसहरू छभन्ने थाहा छ । आगो लगाइदिएको छ । एकजना पत्रकार भाइको जलेर मृत्यु भएको छ’, लेखकले भने, ‘त्यसैगरी अर्का एकजना मानिसको मृत्यु भएको छ । स्थितिलाई सामान्य गर्नका लागि प्रहरीले बल प्रयोग गर्ने क्रममा मृत्यु भएको छ । सञ्चारगृहहरूमाथि आक्रमण भए ।’

लेखकले भने, ‘उद्योग, व्यापारिक प्रतिष्ठानहरूमाथि आक्रमण भएका छन् । गणतन्त्र पक्षधर, संघीयता पक्षधर, लोकतन्त्र पक्षधर पार्टीका कार्यालयहरूमा आगजनी भए । नेताहरूको घरमा समेत आक्रमण भएका छन् । अत्यन्तै ज्यादा अमर्यादित र अपराधिक कार्यहरू भएका छन् । त्यसको भर्त्सना भएको छ ।’

‘त्यस्ता अपराधिक कार्यमा संलग्न व्यक्तिहरूलाई कडाभन्दा कडा कारबाही गर्नुपर्छ भन्नेमा सबै दलहरू एकमत भएका छन्’, गृहमन्त्री लेखकले भनेका छन् ।

‘संविधान विरोधी कुनै पनि गतिविधिहरू, संघीय लोकतान्त्रिक गणतन्त्रात्मक व्यवस्था र संविधानका विरुद्ध हुने कुनै पनि षड्यन्त्रलाई सहन गरिने छैन । क्षम्य हुने छैन’, उनले भने ।

‘संघीय लोकतान्त्रिक गणतन्त्रात्मक शासन व्यवस्था र अहिलेको संविधानका विरुद्धमा षड्यन्त्रमूलक गतिविधिहरू भइरहेका छन् । यसका बारेमा समीक्षा भयो’, गृहमन्त्री लेखकले भने ।

‘नेपाली नागरिकको जनताको इतिहाँसमा धेरै लामो संघर्ष बलिदानले हामीले संघीय लोकतान्त्रिक गणतन्त्रात्मक शासन व्यवस्था समावेशिता र अहिलेको संविधान प्राप्त गरेको हो । यो संविधानको रक्षा गर्ने कुरामा सबै एकमत छौँ’, उनले भने ।

‘यसै व्यवस्थाका माध्यमबाट जनतालाई सुविधा प्रदान गर्ने, देशलाई समृद्धितर्फ लैजाने कुरामा सबैको निष्कर्ष रह्यो’, लेखकले भनेका छन् ।

उनले गणतन्त्र पक्षधर राजनीतिक दलका प्रमुख नेता एवम् अरु नेता साथीहरूको बैठक भएको बताए । ‘सबै पार्टीका नेताहरूले आफ्नो धारणा राख्नुभयो’, लेखकले भनेका छन् ।

बैठकमा प्रधानमन्त्री समेत रहेका एमाले अध्यक्ष ओली, नेपाली कांग्रेसका सभापति शेरबहादुर देउवा, नेकपा (माओवादी केन्द्र)का उपाध्यक्ष नारायणकाजी श्रेष्ठ, जनता समाजवादी पार्टी नेपालका अध्यक्ष उपेन्द्र यादव, लोसपाका अध्यक्ष महन्थ ठाकुर, जनमत पार्टीका अध्यक्ष सीके राउत लगायतको उपस्थिति रहेको थियो । बैठकमा राप्रपा र रास्वपालाई बोलाइएको थिएन ।