काठमाडौं । अप्रिल ५ र ६ तारिखमा अस्ट्रेलियाको मेलबर्न सहरमा आयोजना हुन गइरहको पाँचौं ग्लोबल खुल्ला ताईक्वाण्डो प्रतियोगितामा भाग लिन ताईक्वाण्डो आईटीएफ नेपालका ५ सदस्यीय टोली त्यसतर्फ प्रस्थान गरेका छन् ।

आइतबार ताईक्वाण्डो आईटीएफ नेपालका संस्थापक अध्यक्ष तथा आईटीएफ ताईक्वाण्डोमा नेपालको लागि पहिलो अन्तर्राष्ट्रिय पदक बिजेता मास्टर लक्ष्मण बस्नेतको नेतृत्वमा सहभागी खेलाडीहरू प्रस्थान गरेका हुन् ।

टोलीमा सस्मन बस्नेतले व्यक्तिगत स्पाइरिंगतर्फ एडल्ट ७५ केजीमा र थर्ड डिग्री व्यक्तिगत प्याट्रनमा, गायजी खडकाले व्यक्ति स्पाइरिंगतर्फ एडल्ट ५५ केजीमा र फोर्थ डिग्री व्यक्तिगत प्याट्रनमा भाग लिने छन् ।

सस्मन बस्नेतले सन् २०१७ मा दक्षिण कोरियामा आयोजना भएको एशियन ताईक्वाण्डो प्रतियोगितामा स्वर्ण पदक जितेका थिए । उनले अन्य धेरै अन्तर्राष्ट्रिय प्रतियोगितामा पदक जितेका छन् ।

गयाजी खडकाले पनि सन् २०२४ मा चीनमा आयोजना भएको एशियन ओपन अन्तर्राष्ट्रिय ताईक्वाण्डो प्रतियोगितामा नेपालको लागि रजत पदक जितेका थिए । सन् २०२३ मा अस्ट्रेलियाको मेलबर्नमा आयोजना भएको तेश्रो ग्लोबल ओपन ताईक्वाण्डो प्रतियोगितामा समेत रजत पदक जितेका थिए ।

दुबै अनुभवी खेलाडी भएको हुँदा यो पटक पनि पदक जित्नेमा ढुक्क रहेको टिम कोच समेत रहेका मास्टर लक्ष्मण बस्नेतले बताएका छन् ।

प्रतियोगितामा नेपाल टिम व्यवस्थापकमा रोजन पण्डित र सस्मिनी बस्नेत पण्डितले अम्पायरको भूमिका निभाउने छिन् । उनले सन् २०२३ मा नेदरलैण्डमा आयोजना भएको विश्व प्रतियोगिता तथा सन् २०२४ मा चीनमा आयोजना भएको एशियन खुल्ला ताईक्वाण्डो प्रतियोगिता लगायतका विभिन्न राष्ट्रिय तथा अन्तर्राष्ट्रिय प्रतियोगितामा सफल अम्पायरको भूमिका निभाई सकेकी छिन् । सस्मन बस्नेत र सस्मिनी बस्नेत पण्डित मास्टर लक्ष्मण बस्नेतको छोरा र छोरी हुन् ।