काठमाडौं । पूर्वराजा ज्ञानेन्द्र शाहको निर्देशनमा मतियार बनेर तीनकुनेमा हिंसा गरी फरार भएका मेडिकल माफिया दुर्गा प्रसाईं ३ दिनपछि सामाजिक सञ्जालमा देखिएका छन् ।

आइतबार प्रसाईंले आफ्नो नामको सचिवालय फेसबुक पेजमा भिडियो अपलोड गर्न लगाएका छन् । प्रसाईंले कुनै मन्दिरमा बसेर भिडियो बनाएका छन् । आफू बसेको स्थानलाई प्रसाईंले गोप्य राखेका छन् । प्रहरीले प्रसाईंलाई तीनकुने हिंसाको नाइकेको रुपमा लिएर पक्राउ गरी कारबाही गर्न खोजेको छ । भगौडा प्रसाईं सम्पर्क बिहीन बनेका छन् ।

भिडियोमा ज्ञानेन्द्रका मतियार प्रसाईं निकै डराएको र हतोत्साहित अवस्थामा देखिएका छन् । बोल्दा पनि प्रसाईंको आवाज निकै दबेको तथा कामेको अवस्थामा सुन्न सकिन्छ । प्रसाईंलाई प्रहरीले धपधपी खोजी गरिरहेका बेला सामाजिक सञ्जालमा देखिएका छन् ।

भिडियोमा प्रसाईंले आफू नभागेको दाबी गरेका छन् । मन्दिरमा बसेको र काठमाडौंभित्र रहेको जनाएका छन् ।

प्रसाईं पूर्वराजा ज्ञानेन्द्र शाहको निर्मल निवासमा लुकेर बसेको भनेर समाचार आइरहेका बेला भिडियो सार्वजनिक गरेका छन् । सो मन्दिर निर्मल निवासभित्र कै हो की भन्ने अड्कलबाजी पनि भएका छन् ।

चैत्र १५ गते शुक्रबार तीनकुनेमा हिंसा भड्काएर प्रसाईं फरार भएका थिए । ३ दिनसम्म सम्पर्क विहीन भएका प्रसाईंले आफूलाई ज्यानमार्न प्रधानमन्त्री केपी ओली सार्पसुटर पाठएकोले गाडी हुइँक्याएर प्रहरीतर्फ गएको लज्जास्पद तर्क दिएका छन् । उनले तीनकुने हिंसाको जिम्मेवार सरकार रहेको आरोप पनि लगाएका छन् ।

भगौडा प्रसाईं तीनकुने हिंसात्मक आन्दोलनको कमाण्डर थिए । उनले प्रदर्शनकारीलाई उत्तेजित बनाउँदै निषेधित क्षेत्रतर्फ जान र हिंसा गर्न उक्साइरहेको भिडियो सार्वजनिक भएको छ । प्रसाईंका कारण दुई जनाको मृत्यु भएको छ । लुटपाट, कुटपिट, निजी र सरकारी सम्पत्तिमा तोडफोड तथा आगजनी भएका छन् ।