काठमाडौं । पूर्वराजा ज्ञानेन्द्र शाहका मतियारहरूले जरिवाना तिराउने काठमाडौं महानगरपालिकाका मेयर बालेन्द्र शाह ‘बालेन’को निर्णय फिर्ता लिन चेतावनी दिएका छन् ।

सोमबार प्रेस विज्ञप्ति जारी गरेर संयुक्त जनआन्दोलन समितिका कार्यवाहक संयोजक डा. जगमान गुरुङले काठमाडौं महानगरपालिकाले ‘श्री ज्ञानेन्द्र शाह निर्मल निवास’ भन्ने उल्लेख गरी जरिवाना पत्र पठाएकोमा समितिको गम्भीर ध्यानाकर्षण भएको जनाएका छन् ।

‘पत्राचारबाट राजाका सम्बन्धमा भ्रम र अनास्था सिर्जना गर्ने कुत्सित उद्देश्य रहेको यस समितिको ठहर रहेको छ’, बालेनलाई चेतावनी दिँदै डा.गुरुङले भनेका छन् ।

‘कार्यक्रम कानून बमोजिम राष्ट्र, राष्ट्रियता, धर्म, संस्कृति र नागरिक बचाउ महाअभियानले अनुमति लिई आयोजना गरिएको नेपाल प्रहरी र जिल्ला प्रशासन कार्यालयको अभिलेखमा समेत उल्लेख रहेको छ’, विज्ञप्तिमा उल्लेख छ ।

‘तथ्यको ज्ञानको अभाव वा भ्रम सिर्जना गर्ने उद्देश्यले गरिएको सो पत्राचार यसपूर्व महानगरपालिका स्वयमले गरेको निर्णय समेतको विपरित छ’, ज्ञानेन्द्रका मतियारहरूले चेतावनी दिएका छन् ।

‘यसपूर्व त्रिभुवन अन्तर्राष्ट्रिय विमानस्थलमा राजाको स्वागतार्थ आयोजित कार्यक्रमका सन्दर्भमा राजालाई नभई आयोजकलाई यस्तो पत्राचार गरिएको आफ्नै नीति विपरित यस पटकको महानगरको निर्णय दुर्भावनायुक्त छैन भन्न सकिने देखिँदैन’, विज्ञप्तिमा भनिएको छ ।

‘कार्यक्रमको जिम्मेवारी आयोजक संस्थाहरू स्वयंले लिने हो । सो निर्णय काठमाडौं महानगरपालिकाले तत्काल फिर्ता नलिएमा सोविरुद्ध कानूनी र अन्य मार्ग प्रशस्त गरिने पनि सबैमा जानकारी गराउन चाहन्छौं’, बालेनलाई चेतावनी विज्ञप्तिमा दिइएको छ ।