काठमाडौं । सहकारी ठगीका अभियुक्त राष्ट्रिय स्वतन्त्र पार्टी (रास्वपा)का सभापति रवि लामिछानेले कार्यदल गठन गरेका छन् ।

सोमबार पार्टी कार्यालयमा बसेको बैठकबाट लामिछानेले दुई उपसभापति डोलप्रसाद अर्याल र स्वर्णिम वाग्लेको संयोजकत्वमा ‘मिसन ब्लुप्रिन्ट कार्यदल गठन’ गरेका हुन् । कार्यदलको संयोजक एक जना हुनुपर्ने थियो । लामिछानेले अर्याल र वाग्ले एकजनालाई मात्रै कार्यदलको जिम्मेवारी दिन सकेनन् । बाध्य भएर दुई जनालाई एउटा कार्यदलको संयोजक बनाएका छन् ।

रास्वपाभित्र दुई उपाध्यक्ष अर्याल र वाग्लेबीच शीतयुद्ध छ । शीतयुद्धको छनक कार्यदलको संयोजक बनाइएकोबाट देखिएको छ ।

सभापति लामिछानेले पार्टी फुटाउने षड्यन्त्रहरू भइरहेको दाबी गर्दै सबै एकढिक्का भएर अगाडि बढ्नुको विकल्प नभएको पनि बताएका छन् । रास्वपाभित्र शीतयुद्ध रहेको र पार्टी कुनै पनि बेला विभाजन हुन सक्ने अनुमान लामिछानेलाई छ ।

केन्द्रीय समितिले राष्ट्रनिर्माणसम्बन्धी खाका तयार गर्न बनेको कार्यदलमा पूर्वमन्त्रीहरू सुमना श्रेष्ठ, शिशिर खनाल, विराजभक्त श्रेष्ठ र तोसिमा कार्की सदस्य छन् ।

लिडरसिप एकेडेमी र उम्मेदवार क्लबको कार्यान्वयनका लागि सह–महामन्त्रीद्वय सुमना श्रेष्ठ र विपिनकुमार आचार्यलाई जिम्मेवारी तोकिएको छ ।

रास्वपाले जनताको कुरा सुन्ने यात्रा अर्थात् जनयात्रा गर्ने भएको छ । २३ चैतमा चितवनबाट जनयात्राको शुभारम्भ गरिने कार्यवाहक प्रवक्ता मनीष झाले बताएका छन् । झाका अनुसार यो यात्राका क्रममा देशव्यापी रूपमा जनतासँग अन्तक्र्रिया गरिनेछ । जनयात्रा कार्यक्रमको कार्यविधिलगायतको संयोजनको जिम्मेवारी संसदीय दलका उपनेता विराजभक्त श्रेष्ठलाई दिइएको छ ।