तीनकुने घटनाको अनुसन्धानमा सहयोग गर्न प्रहरीको अनुरोध

काठमाडौं । जिल्ला प्रहरी परिसर काठमाडौंले तीनकुनेमा भएको प्रदर्शनको हिंसात्मक रूपबारे अनर्गल फोटो र भिडियोहरू प्रसारण गरिएको भन्दै त्यस्ता क्रियाकलाप रोक्न आग्रह गरेको छ ।

प्रहरीले सोमबार विज्ञप्ति जारी गरेर सामाजिक सञ्जालमा प्रसारण भएका अनर्गल फोटो र भिडियोहरूका कारण अन्योल, भय र गलत धारणा फैलिन सक्ने चिन्ता जनाएको छ । प्रहरीले तीनकुने घटनाको सामग्री भए उपलब्ध गराउन आग्रह गरेको छ ।

काठमाडौं प्रहरीका एसपी अपील बोहराले सूचना प्रकाशन गरेर भनेका छन्, ‘गलत धारणा फैलिनेतर्फ सबै पक्ष गम्भीर तथा जिम्मेवार हुन अपील गर्दछौँ ।’

घटनाबारे छानबिन र अनुसन्धान भइरहेको भन्दै प्रहरीले त्यस्ता सामग्री भएमा जिल्ला प्रहरी परिसर काठमाडौंको फेसबुक पेज र इमेल ठेगानामा उपलब्ध गराउन अनुरोध गरेको छ ।

Published : Tuesday, 2025 April 1, 7:57 am