काठमाडौं । व्यक्तिगत र सर्वसाधारण मानिसहरूलाई तनाब दिने गरी सामग्री बनाएर सामाजिक सञ्जाल युट्युबमा राख्दै आएकी युट्युबर गंगा लामा प्रहरी पक्राउ परेकी छिन् ।

मंगलबार नेपाल प्रहरीको साईबर व्यूरोले युट्युब च्यानल गुड टिभीकी सञ्चालिका लामालाई पुतलीसडकबाट पक्राउ गरिएको साइबर व्यूरो स्रोतले जनाएको छ ।

व्यूरोको टोलीले लामालाई पुतलीसडकबाट पक्राउ गरेर हिरासतमा राखेको छ । लामाले केहीदिनअघि ‘बुवा र छोरी रंगेहात भेटिएपछि’ भन्ने सामग्री प्रशारण गरेकी थिइन् ।

मोरङको मिक्लाजुङ गाउँपालिका–६ घर भएर काठमाडौं बस्ने लामालाई प्रहरीले विद्युतीय अपराधसम्बन्धी कसूरमा अनुसन्धान गर्न अदालतबाट पक्राउ अनुमति लिएको थियो ।

लामा निकै विवादित युट्युबर पर्छिन् । लामाका विरुद्ध प्रेस काउन्सिल नेपालमा पनि थुप्रै उजुरीहरू परेका छन् । विशेष गरेर लामाले व्यक्तिगत जीवनलाई आधार बनाएर युट्युब सामग्री बनाउने गर्दै आएकी छिन् । उनले मानिसहरूलाई थर्काएर प्रश्न सोध्न गर्दै आएको आरोप छ ।